Բրյուսելում Հայաստանի եւ Ադրբեջանի արտգործնախարարների հանդիպումը ճանաչողական էր: Այս մասին, այսօր՝ հուլիսի 16-ին, լրագրողների հետ հանդիպման ժամանակ ասաց Հայաստանի ԱԳ նախարարի մամուլի խոսնակ Տիգրան Բալայանը՝ խոսելով օրերս Բրյուսելում տեղի ունեցած Հայաստանի եւ Ադրբեջանի արտգործնախարարների հանդիպման մասին։
Նա նշեց, որ այս պահին չի կարող ասել, որ ինչ-որ կոնկրետ պայմանավորվածություն է ձեռք բերվել. «Պայմանավորվածություն կա, որ կոնտակտները շարունակվելու են։ Ոչ պաշտոնական մակարդակով հնչեցված տեսակետ կա, որ միգուցե Հայաստանում ընտրությունների շրջան է սկսվում, եւ ինչ-որ «պաուզա» պետք է վերցնել եւ դրանից հետո նոր շարունակել։
Մենք գտնում ենք, որ նախընտրական շրջանը խոչընդոտ չի կարող հանդիսանալ բանակցային գործընթացի վրա։ Ե՛վ վարչապետ Փաշինյանը, եւ՛ արտգործնախարար Մնացականյանն են ընդգծել, որ կարեւորագույն հարցն Արցախի անվտանգության հարցն է, որի ապահովման սկզբունքով ենք մենք առաջնորդվում»,-հայտարարեց Տիգրան Բալայանը:
Նա նաեւ ընդգծեց, որ ԱԳ նախարարների հանդիպմանը Հայաստանի վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի միջեւ հանդիպման մասին պայմանավորվածություն չի եղել: