ՀՀ արտակարգ իրավիճակների նախարարությունում այսօր՝ հուլիսի 16-ին, կայացել է հերթական ամենշաբաթյա խորհրդակցությունը, որը վարել է նախարար Հրաչյա Ռոստոմյանը:
Հայաստանի ԱԻՆ-ից NEWS.am-ին հայտնում են, որ փրկարար ծառայության տնօրեն, փ/ծ գնդապետ Ա. Նահապետյանը զեկուցել է անցած շաբաթվա ընթացքում գրանցված ահազանգերի, ձեռարկված արձագանքման միջոցառումների, կազմակերպված ուսումնավարժությունների, ծառայողական քննությունների ընթացքի եւ այլ գերատեսչություններին քաղպաշտպանության հարցերով ցուցաբերված մեթոդական օգնության մասին:
ՀՀ ԱԻՆ պետական հրդեհային եւ տեխնիկական անվտանգության տեսչության պետ Ա.Մկրտչյանը խորհրդակցությանը հայտնել է, որ անցած շաբաթվա ընթացքում տեսչությունը ստուգումներ է անցկացրել 12 օբյեկտում եւ շարունակում է հետեւել ԱԳԼՃԿ-ներին նախկինում հանձնված կարգադրագրերի իրականացման ընթացքին:
Խորհրդակցության ընթացքում նախարար Հ.Ռոստոմյանը համակարգի ոլորտային ստորաբաժանումների ղեկավարներին հանձնարարել է ներկայացնել զարգացման ծրագրեր՝ յուրաքանչյուրն իր մասով, ժամանակակից տեխնոլոգիաների ներդրմամբ՝ ուսումնասիրելով միջազգային առաջավոր փորձը եւ հիմնվելով Հայաստանում առկա ներուժի վրա:
ՀՀ ԱԻ նախարարը ՓԾ տնօրենին հանձնարարել է ներկայացնել առաջարկություն փրկարարների կողմից կենցաղային կանչերի արձագանքումը կարգավորելու ուղղությամբ՝ հաշվի առնելով մարդկային կյանքի ու անվտանգության ապահովումը, ինչպես նաեւ խստացնել նյութատեխնիկական ապահովման հարցերի եւ առկա ռեսուրսների նպատակային օգտագործման վերահսկողությունը.
«Նախարարությունում արտոնյալ մարդիկ չկան: Որեւէ խախտում նկատելու դեպքում կդիմեմ խիստ միջոցների»,- ասել է Հրաչյա Ռոստոմյանը: Նախարարը եւս մեկ անգամ հրահանգել է խստիվ հետեւել, որպեսզի օպերատիվ ու ծառայողական նպատակներով հատկացված ավտոմեքենաները չօգտագործվեն անձնական նպատակներով:
Նախարարությունում կստեղծվի նաեւ հանձնաժողով՝ սեպտեմբերի 4-ին նշվող ՀՀ ԱԻՆ աշխատողի օրվան նվիրված միջոցառումներին պատշաճ կերպով նախապատրաստվելու համար:
