Պետք է արմատապես կրճատել ընտրագրավի շեմը, քանի որ ընտրագրավի բարձր շեմ սահմանելով ստեղծվում է մի վիճակ, երբ ընտրություններին կարող են մասնակցել բիզնեսի հետ լուրջ կապեր ունեցող ուժերը: Այս մասին, այսօր՝ հուլիսի 16-ին, կառավարությունը ընտրական փոփոխությունների հարցով վարչապետին կից հանձնաժողովի նիստում հայտարարել է «Նոր քաղաքական մշակույթ» կուսակցության նախագահ Անի Զախարյանը:
«Մեր երկրում տեղի ունեցան քաղաքական փոփոխություններ, որով բոլորս ենք ոգեւորված: Այդ փոփոխությունների պատասխանատուն ներկայիս կառավարությունն է, որի խնդիրն է, եթե հնչեցնում ենք ժողովրդավարություն, հեղափոխություն բառերը, առաջիկա ընտրությունների համար ապահովենք նման պայմաններ»,- ասաց Զախարյանը՝ նկատելով, որ եթե ընտրագրավի բարձր շեմը պահպանվի, ընթանալու են գումարի ընտրություններ, ոչ թե գաղափարների:
Զախարյանը, մասնավորապես, առաջարկեց, որ ԱԺ ընտրությունների համար սահմանել գրավը 3 միլիոն դրամ, ՏԻՄ ընտրությունների համար՝ 2 միլիոն, մինչդեռ հիմա ընտրագրավը ԱԺ ընտրությունների ժամանակ 10 մլն դրամ է:
Զախարյանն առաջարկեց նաեւ հանել վճարովի եթերը, քանի որ պետությունը պետք է կարողանա ապահովել այնպիսի բանավեճային մշակույթ, որ վճարովի եթերի կարիք չլինի: