Այն ժամանակ, երբ ընտրությունները տեղի էին ունենում համամասնական եւ մեծամասնական ընտրակարգերով, որպես կանոն մեծամասնական ընտրակարգով ընտրվում էին մարդիկ, որոնք գրեթե ոչ մի կապ չունեին քաղաքականության հետ: Այս մասին, այսօր՝ հուլիսի 24-ին, ԱԺ-ում ընտրական օրենսգրքի փոփոխությունների հարցով աշխատանքային խմբի հանդիպման ժամանակ նշեց վարչապետին կից ընտրական բարեփոխումների հանձնաժողովի քարտուղար Դանիել Իոաննիսյանը:
Նա հիշեցրեց, որ այդ ընտրակարգի պարագայում, մեծամասնական ընտրակարգով ընտրվում էին իշխող ուժի կամ կոալիցիայի ներկայացուցիչները, ընդ որում, այդ ընտրությունների արդյունքներով, իշխող ուժը համամասնական ընտրակարգով ոչ միայն 50 տոկոսից, այլեւ անգամ 40 տոկոսից քիչ ձայն էր հավաքում, պակասը լրացնում էին մեծամասնականով ընտրված անձինք:
«Իսկ արդեն 2017 թվականի ընտրություններում ՀՀԿ-ն իր պատմության մեջ առաջին անգամ հավաքեց 50 տոկոսից ավելի ձայն: Ընդ որում, տեղամասերում վերահսկողության առումով դրանք առավել հաջողված ընտրություններն էին: Մենք չենք կարող ասել, որ նկարչության արդյունքում էր դա ձեւավորվել: Հիմա այլեւս կարիք չկա հիմնավորելու, որ այդ կուսակցությունը չուներ այդ բարձր հեղինակությունը, որն ստացել է ընտրություններում:
Պարզապես ռեյտինգային ընտրակարգի շնորհիվ ՀՀԿ-ն ստացել է ձայներ հետեւյալ սխեմայով. մարդկանց որոշման կայացումը հիմնված էր ոչ թե քաղաքական ծրագրերի, այլ անձանց վրա: մարդիկ քվեարկում էին իրենց թաղի լավ տղային, հորեղբոր գործատուին, մեկին, ով իրենց ընտրակաշառք է բաժանել կամ ճնշել է: Դրանց կարելի է անվանել «լոկալ ֆեոդալներ»: Քանի որ այդ ֆեոդալները ՀՀԿ-ից էին, այդ ձայները գնացին այդ ուժին: Ընդ որում, այդ ֆեոդալները ոչ ելույթ են ունեցել ԱԺ-ում, ոչ էլ իրենց տարածքների խնդիրներն են բարձրացնել»,-ընդգծեց նա:
Իոաննիսյանը համոզմունք հայտնեց, որ ռեյտինգային ընտրակարգը, լինի համապետական, թե տարածքային, իր մեջ ռիսկ ունի, որ մարդիկ քվեարկելու են անձին, ոչ թե քաղաքական ուժին. «Եթե նախկինում ինչ-որ մեկն առաջադրվում էր Մալաթիա-Սեբաստիա համայնքում եւ ստանում էր ռեկորդային թվով ձայներ, կապ չունենալով պատգամավորական գործունեության հետ: Հետո ընտրատարածքը մեծացավ, իր մեջ ներառեց նաեւ Շենգավիթը, սակայն դա չխանգարեց, որ Մալաթիա-Սեբաստայի ֆեոդալը ստանա իր ռեկորդային թվով ձայները: Եթե ընտրական տարածքը ներառի ամբողջ հանրապետությունը, միեւնույն է, դա չի խոչընդոտի, որ այդ անձը իր տարածքում ձայներ բերի իրեն եւ իրենով նաեւ կուսակցությանը: Խոսքը մեկ անձի մասին չէ, նա ընդամենը «ֆեոդալի» օրինակ է:
Սրա արդյունքում անցած ԱԺ ընտրություններն անցան ապաքաղաքական մթնոլորտում եւ ավելի շատ հիշեցնում էին շուկայական հարաբերություններ»: