Եթե անցնում ենք մրցակցային ընտրությունների, ապա կուսակցությունները շահագրգռված են իրենց ցուցակներում ընդգրկել այնպիսի անձանց, որոնք ձայն կբերեն: Այս մասին, այսօր՝ հուլիսի 24-ին, ԱԺ-ում ընտրական օրենսգրքի փոփոխությունների հարցով աշխատանքային խմբի հանդիպման ժամանակ նշեց վարչապետին կից ընտրական բարեփոխումների հանձնաժողովի քարտուղար Դանիել Իոաննիսյանը:
«Եթե որեւէ կուսակցություն հանդես գա միայն երեւանցիներից կազմված ցուցակով, մրցակից քաղաքական ուժն էլ կարող է հանդես գալ ցուցակով, որտեղ շատ կլինեն մարզերի թեկնածուները եւ մարզերի բնակիչներն էլ կասեն՝ դե երեւանցիները զզվացրեցին, ես կքվեարկեմ այն ուժին, որտեղ մարզերից մարդիկ կան:
Այսինքն կուսակցությունները շահագրգռված են լինելու, որ մարզերից անձինք լինեն իրենց ցուցակներում: Կուսակցությունը նաեւ շահագրգռված է լինելու ցուցակում ընդգրկել հեղինակություն ունեցող անձանց, որ շատ ձայն հավաքի: Այսինքն կուսակցության ներքին ժողովրդավարության հարցը այս ձեւով կարգավորվում է»,-հայտարարեց Իոաննիսյանը:
Անդրադառնալով բաց ցուցակներով համասնական ընտրակարգին, Իոաննիսյանն ասաց, որ կուսակցությունները կարող են ներկայացնել մինչեւ 300 հոգանոց ցուցակներ, ու եթե անգամ դրանց կեսն են ռեյտինգային, ապա ամեն ուժ ունենալու է առնվազն 150 թեկնածու. «Դուք պատկերացնո՞ւմ եք այդ քվեաթերթիկի տեսքը: Դա լավաշ է լինելու: Կամ պատկերացնո՞ւմ եք այն ծրարի տեսքը, որտեղ պետք է տեղավորվի այդ «լավաշը»: Եթե անգամ մարդկանց ունունների փոխարեն թվեր են լինելու, դա էլ այլ խնդիրներ է առաջ բերելու: Մեր հանձնաժողովն այն որոշմանն է, որ պետք է ընդհանրապես հրաժարվել գրիչի կիրառումից: պարզ, փակ ցուցակներով համամանսական համակարգը թույլ է տալիս հրաժարվել գրիչից: Ընտրողը իր նախընտրած ցուցակը, առանց նշում անելու, դնում է ծրարի մեջ եւ կատարում իր ընտրությունը: Մենք ձերբազատվում ենք տարբեր գույնի գրիչներից»:
Ինչ վերաբերում է տարածքային ցուցակներին, Իոաննիսյանն ասաց, որ Հայաստանը փոքր երկիր է եւ մեղրեցու եւ տավուշցու շահերը էապես շատ չեն տարբերվում իրարից, պետք չի մասնատել երկիրը: Էս երկիրը առանց այդ էլ շատ է բաժանված, պետք չի ավելի շատ մասնատել:
Հարցին, թե արդյոք կառավարությունը պատրաստ է ընտրակարգի մոդելի հարցում զիջման գնալ այլ ուժերի հետ, թե մինչեւ վերջ պնդելու է փակ ցուցակներով համամասնականի մոդելը, Իոաննիսյանը պատասխանեց. «Եթե մենք քննարկումների համար բաց չլինեինք, մենք չէինք գա այստեղ: Մենք այստեղ ենք քննարկումների առջեւ: Ես չեմ բացառում, որ մենք լսենք այնպիսի փաստարկներ, որ փոխենք մեր տեսակետը»:
