Քանի որ ես գործադիր իշխանության մեջ չեմ, չգիտեմ, թե ԵՄ-ի հետ ինչ «action plan» է քննարկվում. Խոսքն այն պլանի մասին է, որով Հայաստանը պետք է ֆինանսավորում ստանար եւ դա ինչ ուղղություններով պետք է ծախսվեր: Այս մասին, այսօր՝ հուլիսի 17-ին, ԱԺ-ում լրագրողների հետ զրույցում նշեց ԱԺ «Ելք» խմբակցության պատգամավոր Էդմոն Մարուքյանը՝ հավելելով. «Ես գիտեմ, որ բոլոր ուղղություններով կա ԵՄ-ի միանշանակ աջակցությունը»:
Անդրադառնալով ՀՀ վարչապետ Նիկոլ Փաշինյանի բրյուսելյան այցին, Մարուքյանը համոզմունք հայտնեց, որ այդ այցը կկապիտալիզացվի. «ԵՄ աջակցությունը շատ կարեւոր է լինելու թե սպասվող արտահերթ խորհրդարանական ընտրությունների հետ կապված, թե բարեփոխումների, որոնք պետք է իրականացնենք մեր երկրում»:
Անդրադառնալով Փաշինյան-Սվիտալսկի «փոխհրաձգությանը», երբ Փաշինյանը հայտարարել էր, որ ԵՄ-ի կողմից բացի հաճոյախոսություններից, այլ բան չի փոխվել, ինչին ի պատասխան Սվիտալսկին արձագանքել էր, որ եթե ԵՄ-ի հանդեպ Հայաստանի դիրքորոշումը չի փոխվել, ինչու է Հայաստանն ակնկալում, որ ԵՄ վերաբերմունքը պետք է փոխվի, Մարուքյանն ասաց. «Ես չեմ հասցրել հետեւել պարոն Սվիտալսկիի ասուլիսին, չեմ կարող միանգամից ասել: Ամեն դեպքում, կարծում եմ՝ բավականին ներկայացուցչական այց է եղել Բրյուսել, բավականին լուրջ հանդիպումներ են եղել, բայց դրանց խութերին մենք ծանոթ չենք»:
Դիտարկմանը, որ Փաշինյանը հայտարարել է, որ չեն հալվելու ԵՄ-ի հաճոյախոսություններից, «Ելք»-ի պատգամավորն ընդգծեց. «Չեմ կարծում, որ հաճոյախոսության կամ հալվելու բան կա: Ես հասկանում եմ հետեւյալը. ԵՄ-ն շատ ջերմ ողջույններով է ընդունել Հայաստանում տեղի ունեցող փոփոխությունները: Մյուս կողմից Փաշինյանի մտահոգությունն այն է, որ մենք ակնկալում ենք կոնկրետ քայլեր: Հիմա այդ կոնկրետ քայլերի հետ կապված կա 160 մլն եվրոյի ծրագիրը, որը նախկին իշխանությունների ժամանակ եղել է խոստումը, հիմա պետք է թարմացնել, չի բացառվում նաեւ մեծացնել: Ես այդ հնարավորությունները տեսնում եմ: Բայց այդ մեծացման տակ պետք է դնել կոնկրետ ծրագրեր:
Հայաստանի պարագայում ԵՄ աջակցությունը կարեւոր է եղել եւ մնում է: Հայաստանը ասոցացման համաձայնագիր է մերժել, կարող էին նաեւ մեզ հետ ավելի սառը հարաբերություններ ունենալ»:
Ինչ վերաբերում է Սվիտալսկիի հայտարարությանը, որ Հայաստանի արտաքին քաղաքականությունը չի փոխվել, այդ դեպքում ինչո՞ւ է Հայաստանն ակնկալում, որ պետք է ԵՄ քաղաքականությունը Հայաստանի հանդեպ փոխվի, Մարուքյանն արձագանքեց. «Հայաստանի արտաքին քաղաքական վեկտորը չի փոխվել, և դա նորություն չէ: Այստեղ ոչ մի «սըրփրայզ» չկա»:
