Գյուղացու եւ ագրովերամշակողի համար պետությունը երկուստեք շահեկան տարբերակ է մտածել:
Կառավարությունից հայտնում են, որ ագրովերամշակման ոլորտի վարկերի տոկոսադրույքների սուբսիդավորման ծրագրով վերամշակողները վարկ են ստանում 3 տոկոս տոկոսադրույքով:
Վարկը ձեւակերպվում է վերամշակողի անունով, մինչդեռ գումարը փոխանցվում է միանգամից գյուղացու հաշվեհամարին: Առեւտուրն ընթանում է հարթ, առանց պարտք ու պահանջի: Վերամշակող ընկերության տնօրեն Վահե Խազարյանի խոսքով, այս տարի արդեն մեր ամբողջ մթերումները իրենք ուղղորդում են հենց այդ ուղղությամբ. «Վերամշակողին դա կայծ է տալիս, որ դու ավելի ռիսկով որոշում կայացնես, վարկային բեռ վերցնես»:
Նշենք, որ եթե նախորդ տարի այս ծրագիրը պիլոտային էր, ապա այս տարի այն հիմնական է. մշակողն ու գյուղացին պայմանագիր են կնքում, այս ծրագրով վերամշակողները հնարավորություն ունեն մինչեւ մեկ մլրդ դրամի վարկ ստանալ մեկ տարով:
Գյուղատնտեսության փոխնախարար Ռոբերտ Մակարյանը նշեց, որ այս տարի հիմնական ծրագրով նախատեսում են յուրաքանչյուր շահառուի հաշվով մինչեւ մեկ մլրդ դրամի վարկավորում. «Ընդհանուր վարկային պորտֆելը կարող է կազմել մինչեւ 18 մլրդ դրամ: Այսօրվա դրությամբ արդեն 18 կազմակերպություններ դիմել են, նախնական դրական եզրակացություն ստացել են, որից 10-ը վարկավորվել է: Ընդհանուր վարկային պորևտֆելը կազմել է 750 մլն դրամ»:
Նշենք, որ ծրագրից օգտվել ցանկացողները դիմում են գյուղնախարարություն կամ Գյուղատնտեսության զարգացման հիմնադրամի մարզային կառույցներ: