ՆԱՏՕ-ն կշարունակի օգնել Վրաստանին Դաշինքի անդամակցությանը նախապատրաստվելու հարցում: Այս մասին հայտարարել է ՆԱՏՕ-ի գլխավոր քարտուղար Յենս Սթոլթենբերգը Վրաստանի վարչապետ Մամուկա Բախտաձեի հետ հանդիպման ժամանակ:
Նա ողջունել է Վրաստանի առաջընթացը բարեփոխումների ոլորտում: «Ես նաեւ ակնկալում եմ դաշնակիցների լայն մասնակցությունը հաջորդ տարի կայանալիք ՆԱՏՕ-ի եւ Վրաստանի զորավարժություններին»,-հավելել է Սթոլթենբերգը։
Կողմերը քննարկել են նաեւ Սեւ ծովում անվտանգության հետ կապված իրավիճակը եւ տարածաշրջանում Ռուսաստանի ռազմական ներուժի զգալի աճը: «Սեւ ծովը ռազմավարական նշանակություն ունի, եւ ՆԱՏՕ-ն ու Վրաստանը ակտիվացնում են համագործակցությունն այդ շրջանում»,-ասել է Սթոլթենբերգը: Գլխավոր քարտուղարը շեշտել է, որ ՆԱՏՕ-ն միասնական է Վրաստանի անվտանգության եւ տարածքային ամբողջականության աջակցության հարցում՝ նրա միջազգայնորեն ճանաչված սահմանների շրջանակներում։
