Իտալիայի կառավարության ղեկավար Ջուզեպե Կոնտեն առաջարկել է ԵՄ ճգնաժամային հանձնաժողով ստեղծել միգրացիայի խնդրի լուծման համար, հաղորդում է «ՏԱՍՍ»-ը՝ վկայակոչելով վարչապետի՝ Il Fatto Quotidiano-ին տված հարցազրույցը: Կոնտեի խոսքով՝ համապատասխան առաջարկով նամակն ինքը հղել է Եվրահանձնաժողովի եւ Եվրախորհրդի նախագահներ Ժան-Կլոդ Յունկերին եւ Դոնալդ Տուսկին:
Մասնավորապես, Կոնտեի գաղափարի համաձայն, Եվրոպական Հանձնաժողովի հովանու ներքո աշխատանքային խումբը կարող էր միջնորդական դեր ստանձնել Եվրամիության երկրների կառավարությունների միջեւ հարավային եվրոպական երկրների միջոցով Եվրոպա ժամանող միգրանտների բաշխման հարցերում:
«Այդպես, միգրանտների բաշխման խնդիրը կլուծվի ոչ թե գործընկեր երկրների կառավարությունների ղեկավարների հետ ուղղակի հեռախոսային խոսակցությունների, այլ՝ Եվրահանձնաժողովի շրջանակներում գործող հատուկ մարմնի կողմից, որը պետությունների միջեւ միջնորդի գործառույթ կկատարի»,- պարզաբանել է Կոնտեն:
Նա նաեւ խոստացել է, որ երրորդ երկրների համաձայնության դեպքում միգրացիոն հոսքերի տարանցման կարգավորման համար ոչ միայն պարզապես ընդունման կենտրոններ կգործեն, այլ՝ պաշտպանության կենտրոններ, որտեղ կքննվեն ապաստան հայցողների դիմումները: Բացի այդ, ըստ նրա, եվրոպացիները մարդասիրական միջանցքներ կկազմակերպեն եւ ինքները կզբաղվեն փախստականների անվտանգ տեղափոխմամբ: