Մեքսիկայի Խալիսկո նահանգում գաղտնի թաղված 6 մարդու աճյուն են գտել, հայտնել է նահանգի դատախազ Ռաուլ Սանչեսը, փոխանցում է «ՌԻԱ Նովոստի»-ն:
«Ամենայն հավանականությամբ, այնտեղ գտնվել է 5 տղամարդու եւ մեկ կնոջ աճյուն»,- լրագրողներին ասել է Սանչեսը: Թաղման վայրը հայտնաբերվել է Գվադալահարային մերձակա Տլախոմուլկո համայնքի տներից մեկի տարածքում:
Դատախազը չի բացառել, որ կարող էր լինել 7 մարմին, քանի որ դրանք մասնատված էին, իսկ փորձագետները հիմա պարզում են նրանց ճշգրիտ թիվը:
Մեքսիկայում նման սարսափազդու գտածոները հազվագյուտ չեն, թաղման գաղտնի վայրեր են հայտնաբերվել Գերերո, Վերակրուս, Մորելոս նահանգներում: Հանցագործները սովորաբար այսպես են թաքցնում թմրամաֆիայի պատերազմներում սպանվածների մարմինները: Խալիսկո նահանգում վայրագություններ է գործում «Խալիսկո – Նոր սերունդ» կարտելը, որը երկրում համարվում է ամենադաժաններից մեկը: