Իրականում մի ստերեոտիպ կա, մի կլիշե, որի համաձայն ժողովրդավարությունը պետք է լինի արեւմտամետ եւ ավելի պակաս պրոգրեսիվ ռեժիմները պետք է լինեն այլ կենտրոններամետ: Այս մասին «Ամերիկայի ձայն»-ին տված հարցազրույցում նշել է ՀՀ առաջին փոխվարչապետ Արարատ Միրզոյանը:
Նրա խոսքով, հայկական ոչ բռնի հեղափոխությունը եկավ ապացուցելու, որ այդ ստերեոտիպը քիչ աղերսներ ունի իրականության հետ. «Մեր հեղափոխության առաջին իսկ օրից հայտարարել ենք, որ չկա որեւ աշխարհաքաղաքական ենթատեքստ, միջամտություն, նախաձեռնություն մեր շարժման մեջ, հետեւաբար արտաքին քաղաքականության մեջ տեղաշարժեր չեն ակնկալվում:
Անշուշտ ակնկալվում են որոշակի սրբագրումներ, անշուշտ մենք պատրաստվում ենք խորացնել մեր հարաբերությունների Եվրոպայի եւ ԱՄՆ-ի հետ, նախեւառաջ որովհետեւ կարծում ենք, որ կա հսկայական ներուժ, որն իրացված չէ եւ ժամանակը նոր պահանջներ է դնում»,-ասաց Միրզոյանը:
Նա, մասնավորապես ընդգծեց ԱՄՆ-ի սիլիկոնային հովտի հետ հարաբերությունների զարգացման հսկայական պոտենցիալը՝ հավելելով, որ Հայաստանի համար առաջնային է ՀՀ-ում բարձր տեխնոլոգիաների զարգացումը:
«Նաեւ ներուժ կա առեւտրային, ներդրումների հարցերում եւ այլն: Սա չպետք է դիտարկել, որ արվում է Հայաստանի այլ գործընկերների ու դաշնակիցների հետ հարաբերությունների հաշվին»,-ընդգծեց նա: