Սեպտեմբերին նախատեսվում է ՀՀ վարչապետ Նիկոլ Փաշինյանի այցը Միացյալ Նահանգներ, որտեղ նա ելույթ կունենա ՄԱԿ-ի գլխավոր ասամբելայում: Այս մասին «Ամերիկայի ձայն»-ին տված հարցազրույցում նշել է ՀՀ առաջին փոխվարչապետ Արարատ Միրզոյանը:
«Ամենայն հավանականությամբ, այդ ժամանակ կլինեն երկկողմ հանդիպումներ ամերիկյան գործընկերների հետ»,-ասաց նա:
Հարցին, թե արդյոք Հայաստանի դաշնակից Ռուսաստանի կողմից կարող է խրախուսվել, որ Հայաստանն ընտրել է ներքին կառավարման եվրոպական մոդելը՝ մարդու իրավունքներ, ազատություններ, քաղաքացիական հասարակության ձեւավորում, ՀՀ առաջին փոխվարչապետը պատասխանեց. «Այն ամենը, ինչ դուք թվարկում եք, դրանք համամարդկային արժեքներ են: Այո, վիճակագրորեն ավելի շատ են արեւմտյան երկրները, որոնք դավանում են այդ արժեքները, բայց ո՞վ է ասում, որ Հայաստան այդ արժեքները պետք է ներմուծվեն Վաշինգթոնից կամ Մոսկվայից, կամ Մադագասկարի մայրաքաղաքից: Սա հայ ժողովրդի համար հարազատ արժեքներ են: Սա մեր օրերի դրությամբ մարդկության հայտնագործած լավագույն հասարակարգն է եւ մենք գնում ենք այդ ճանապարհով, ժողովրդավարության ճանապարհով: Այստեղ մենք որեւէ գործընկերոջ ոչ ցուցումն ենք ստացել, նկատի ունեմ մեր արեւմտյան գործընկերներին, ոչ էլ որեւէ այլ գործընկերների թույլտվության կարիքը կա, նկատի ունեմ մեր հյուսիսային գործընկերոջը»:
Նա նշեց, որ Հայաստանը հարգանքով է վերաբերում իր գործընկերներին, նրանք էլ իրենց հերթին հարգանքով են վերաբերում Հայաստանի ինքնիշխանությանը, անկախությանը: «Հայաստանի ժողովրդի բացառիկ իրավունքն է՝ որոշել ինչպես ապրել»,-ընդգծեց Արարատ Միրզոյանը: