Բրյուսել կատարած իմ այցի ընթացքում բոլոր հանդիպումներում արձանագրել են հետեւյալը. ժողովրդավարությունը մեզ համար ոչ թե արտաքին քաղաքական կողմնորոշում է, այլ դա մեր համոզմունքն ու հավատամքն է: Այս մասին, այսօր՝ հուլիսի 20-ին, լրագրողների հետ հանդիպման ժամանակ նշեց ՀՀ վարչապետ Նիկոլ Փաշինյանը:
«Դա մեր ժողովրդի քաղաքական արժեքների համախումբն է, երկրորդ՝ երկար տարիներ ԵՄ-ն ասել է, որ «Արեւելյան գործընեկերության» երկրների հետ ինքը հարաբերվում է «ավելին ավելիի դիմաց» բանաձեւով: Այդ «ավելին» վերաբերվել է այն հռչակված արժեքներին, որը բոլորիս հայտնի է՝ ժողովրդավարություն, անկախ դատական համակարգ, կոռուպցիայի դեմ պայքար եւ այլն: Մինչեւ իմ այցը ԵՄ-ից եղել է հայտարարություն, որ ԵՄ-ն պատրաստվում է Հայաստանին աջակցել ինչ-որ ձեւով, եւ ես այս համատեքստում իմ տարակուսանքն եմ արտահայտել, որ ԵՄ առաջարկած բանաձեւը չի աշխատում հենց ԵՄ քաղաքականության համար»,-հայտարարեց Փաշինյանը:
Նա տարակուսանք հայտնեց, որ ԵՄ մի շարք գործընկերներ իր հետ հանդիպումներում ասել են, որ ինչպես նախկինում, հիմա էլ իրենք ակնկալում են Հայաստանում փոփոխություններ. «Ինձ համար զարմանալի է, որ ԵՄ-ում կան պաշտոնյաներ, որոնք չեն նկատում Հայաստանում տեղի ունեցած փոփոխությունները: Ես ասել եմ, որ այսօրվա կառավարությունն առանց որեւէ լումա ծախսելու կոռուպցիայի դեմ պայքարում արել է ավելին, քան ԵՄ-ի եւ Հայաստանի նախկին կառավարությունների համագործակցության ժամանակ տեղի է ունեցել տասնյակ միլիոնավոր եվրոներ ծախսելով:
Մենք հանուն ֆինանսական աջակցության ոչինչ չենք արել ու չենք անելու, մենք ամեն բան անում ենք մեր տրված մանդատն իրացնելու համար: Մենք մեր ուղերձները հստակ ուղղել ենք մեր գործընկերներին: Իրենք պետք է դիրքավորվեն մեր դիրքորոշման նկատմամբ»,-ընդգծեց Փաշինյանը:
