ՀՀԿ–ի առաջարկած տարբերակը նույն ռեյթինգային ընտրակարգն է, սակայն քողարկված։ Այս մասին Ազգային ժողովում Ընտրական օրենսգրքի փոփոխությունների հարցով ԱԺ 4 ուժերի ներկայացուցիչներից կազմված աշխատանքային խմբի այսօրվա՝ հուլիսի 20-ի նիստին հայտարարեց «Ծառուկյան» խմբակցության պատգամավոր Նաիրա Զոհրաբյանը։
«Մենք, իհարկե, հակված ենք գնալ առավելագույն կոնսենսուսի տարբերակով, որովհետեւ բոլորիս խնդիրն է ունենալ մեկ ընտրական նախագիծ»,–ընդգծեց նա։
Պատգամավորի խոսքով՝ ՀՀԿ առաջարկած երկու ցուցակի տարբերակը բավականաչափ բարդացված է։ «Ըստ էության, դա նույն քողարկված նախորդ ռեյթինգային ընտրակարգն է, մի քիչ այլ մոդիֆիկացիայով։ Եթե համաձայն չեք մեր առաջարկած քվոտավորման մոդելին, գտնենք ուրիշ մոդել, բայց պետք է լինի մեկ համամասնական ցուցակ։ Մենք պատրաստ ենք կոնսենսուսի, բայց ոչ այս բարդացված եղանակով։ Պետք է լինի 1 համամասնական ցուցակ, ոչ երկուսը, այլապես սա նման է ձախ ականջը աջ ձեռքով բռնելուն: Մի անգամ գնացինք Սան Մարինոյի մոդելով, հիմա էլ գերմանական մոդելով, եկեք ընտրենք մեր մոդելը, որը աշխատելու է Հայաստանում»,–շեշտեց նա։
Զոհրաբյանն հավելեց՝ «Ծառուկյան դաշինքը» երկար է քննարկել եւ պնդում է մեկ միասնական ցուցակի տարբերակը, իսկ մարզային ներկայացված թեկնածուների հարցը հետագա քննարկման առարկա կդառնա։