Իտալիան նախատեսում է ապագայում մերժել միգրանտների ընդունումը, որոնք Միջերկրական ծովում փրկվել են ԵՄ «Սոֆիա» առաքելության ընթացքում, հայտնում է Welt-ը:
Պարբերականի տրամադրության տակ է նամակ, որը Իտալիայի ԱԳ նախարար Էնցո Մոավերո-Միլանեզին 3 օր առաջ ուղարկել է ԵՄ դիվանագիտության ղեկավար Ֆեդերիկա Մոգերինիին: Հաղորդվում է, որ գործի անհետաձգելիության պատճառով քաղաքական եւ անվտանգության հարցերով (PSC) կոմիտեի լիազորված ներկայացուցիչները դեռեւս չորեքշաբթի խորհրդակցել են փրկված միգրանտների տեաբաշխման այլընտրանքային որոշումների կապակցությամբ, սակայն նրանց չի հաջողվել կոնսենսուսի հասնել: Քննարկումը կշարունակվի երկուշաբթի, հայտնում է Welt-ը:
«Մենք պահանջում ենք անհապաղ վերանայել գործողության ծրագիրը (EUNAVFOR MED - խմբ.) ափհանման կանոնների առումով, որ դրանք լիովին համապատասխանեն պարտավորությունների ազնիվ բաշխման սկզբունքին, որը գրանցված է ԵՄ պայմանագրի 80-րդ հոդվածում»,- նշված է Իտալիայի կառավարության նամակում:
«Տվյալ իրադրության պայմաններում Իտալիան այլեւս այն դիրքում չէ, որ համաձայնվի իրեն պահել EUNAVFOR MED գործողության ծրագրին համապատասխան, որն ուղղորդվում է այլեւս գոյություն չունեցող սահմանների անվտանգության ապահովման «Տրիտոն» առաքելությամբ, որի շրջանակում բոլոր փրկված միգրանտները ափ են հանվել բացառապես իտալական նավահանգիստներում՝ առանց հետագա տեղաբաշխման անդամ երկների միջեւ»,- գրել է Մեավերո-Միլանեզին:
ԵՄ երկրների EUNAVFOR MED գործողությունը, որն ավելի ուշ ստացել է «Սոֆիա» անունը, գործում է 2015 թվականից, որի հիմնական խնդիրն է մարդկանց փրկությունը եւ Միջրերկրականով միգրանտների ապօրինի տեղափոխմանը դիմակայելը: 2016-ի հունիսին ԱԳ նախարարներն ընդլայնել են նրա մանդատը՝ հավելելով լիբիական առափնյա պահպանության եւ ՌԾՈՒ սպաների ուսուցման խնդիրը:
Հինգշաբթի Իտալիայի վարչապետ Ջուզեպե Կոնտեն առաջարկել էր հիմնել ԵՄ ճգնաժամային կոմիտե, որը կզբաղվեր Եվրոպա ժամանած միգրանտներին տեղաբաշխելով:
Անցած հանգստյան օրերին Իտալիայի ֆինանսական գվարդիայի նավը եւ ԵՄ արտաքին սահմանների հսկողության Frontex գործակալության նավը Սիցիլիայում ափ էր իջեցրել 450 միգրանտի, երբ եվրոպական 5 երկրներ համաձայնվել էին նրանց ընդունել: Կոնտեն հայտնել էր, որ Իսպանիան, Պորտուգալիան, Ֆրանսիան, Գերմանիան եւ Մալթան պատրաստ են ընդունելու 50-ական մարդու: Ավելի վաղ Կոնտեն թույլ էր տվել Պոցցալո նավահանգստում ափ իջեցնել այս 2 նավերում եղած 43 կնոջ եւ 14 երեխայի: Կիրակի երկրի ՆԳՆ-ն հավանություն էր տվել մյուս միգրանտների ափհանմանը:
