Վարչապետին առընթեր ընտրական օրենսդրության բարեփոխումների հանձնաժողովը սկսել է քննարկումներ Ընտրական օրենսգրքի փոփոխությունների շուրջ, որի աշխատանքները կշարունակվեն հետագայում ավելի լայն ֆորմատով: Այս մասին, այսօր՝ հուլիսի 20-ին, լրագրողների հետ հանդիպման ժամանակ նշեց ՀՀ վարչապետ Նիկոլ Փաշինյանը:
Լրագրողի դիտարկմանը, թե վարչապետին կից հանձնաժողովը ներկայացրել է փակ ցուցակներով համամասնական ընտրակարգի մոդելը, ինչը հնարավորություն չի տալիս մարզերում իսկապես արժանավոր մարդկանց առաջադրվել, Փաշինյանն արձագանքեց. «Այդ հանձնաժողովը աշխատանքային է, կառավարություն չէ, ԱԺ չէ: Այդ խումբը սկսել է աշխատանք, որը պետք է շարունակվի ավելի լայն ֆորմատով: Այն, ինչ նրանք առաջարկում են, ըստ էության, նախագծի նախագիծ է: Այդ հարցերը կքննարկենք:
Կա նաեւ պարզ իրագործելության խնդիր: Ինքս որեւէ սցենար չեմ բացառում: Մեզ համար կարեւոր է, որ ընտրությունների արդյունքում ձեւավորված խորհրդարանը լինի լիարժեք լեգիտիմ»:
Անդրադառնալով ընտրությունների անցկացման հնարավոր ժամկետների հարցին, Փաշինյանն ասաց, որ Հայաստանում արտահերթ ընտրությունները տեղի կունենա մոտավորապես 11 ամսվա ընթացքում:
«Իսկ եթե ավելի կոնկրետ, ապա դա կախված է բազմաթիվ հանգամանքներից, մեկ տարվա ընթացքում, այսինքն՝ ամենաուշ ժամկետը, որ տեղի կունենան ընտրությունները, հաջորդ տարվա մայիսն է»,- ասաց գործադիրի ղեկավարը:
