Հայաստանի Կոտայքի մարզի Արամուս գյուղում հոկտեմբերի վերջին հյուրանոցային եւ ռեստորանային բիզնեսի համար չժանգոտող մետաղից սարքավորումների արտադրության գործարան կհիմնվի: Համագործակցության հուշագիրը հուլիսի 20-ին ստորագրել են Business Armenia (BA) բիզնեսին աջակցության խմբի նախագահ Հայկ Միրզոյանը եւ ARGA-Eurosteel ընկերության (Հայաստանում ներդրողի պաշտոնական ներկայացուցիչ) գործադիր տնօրեն Կարեն Սալխանյանը:
Հայկ Միրզոյանը լրագրողներին ասել է, որ 850 հազար դոլարի ներդրում է նապատեսված, սակայն, ըստ նախնական գնահատականների, ներդրումներն արդեն գերազանցել են 1 միլիոնը: Ներդրողներն են Saltek եւ Giro Stainless Steel ընկերությունները: Գործարանում 24 աշխատատեղ կբացվի՝ միջին ամսական 300 հազար դրամ աշխատավարձով:
«Այս գործարանը հնարավորություն կտա հայ գործարարներին երրորդ երկրներից ներկրելու փոխարեն տեղական արտադրության անհրաժեշտ սարքավորումներ գնել: Սարքավորումները կլինեն բարձր որակի, քանի որ ներդրող ընկերությունն ունի ISO9001 ISO14001 OHSAS18001 համապատասխանության հավաստագրերը»,- ասել է նա:
Նաեւ քննարկումներ են ընթանում պետական ծրագրի շրջանակներում օժանդակության, հումքի ներմուծման համար մաքսատուրքերից ազատման եւ ավելացված արժեքի հարկի վճարման ժամկետի երկարաձգման թեմայով: Սարքավորումների արտադրության համար հումքը նախատեսվում է ներմուծել Հնդկաստանից:
«Մենք որոշում ենք կայացրել Հայաստանում գործարան հիմնել, քանի որ այստեղ զբոսաշրջության այս ոլորտում մեծ ներուժ ենք տեսնում: Արտադրությունը կարտահանվի նաեւ ԵԱՏՄ երկրներ՝ Վրաստան, Ուկրաինա եւ Իրա»,- իր կողմից նշել է Կարեն Սալխանյանը:
Նա հավելել է, որ Saltek-ը նախատեսում է Հայաստանում շուրջ 2 միլիոն դոլար ներդնել արեւային մարտկոցների արտադրության մեջ եւ շուրջ 1 միլիոն դոլար՝ Երեւանում գիշերային լուսավորության համար:
