2018 թվականի 1-ին կիսամյակի ընթացքում ՀՀ արդարադատության նախարարության քրեակատարողական հիմնարկներում պարբերաբար կազմակերպվել է ընդհանուր առմամբ 80 (2017թ. 1-ին կիս.՝ 78) մարզական միջոցառում:
Անցկացվել են շախմատի, շաշկու, թենիսի, դոմինոյի, ֆուտբոլի, բիլիարդի ներհիմնարկային առաջնություններ: Դատապարտյալների շրջանում ֆիզկուլտուրայի ու սպորտի զարգացման, առողջ ապրելակերպի դրսեւորման, ինչպես նաեւ զբաղվածության, անձնական, մշակութային, կրթական զարգացման պատշաճ պայմանների ապահովման համար տարբեր կազմակերպությունների հետ համագործակցությամբ կազմակերպվել են տարաբնույթ միջոցառումներ:
«Իրավական կրթության եւ վերականգնողական ծրագրերի իրականացման կենտրոն» ՊՈԱԿ-ը «Աբովյան» քրեակատարողական հիմնարկում իրականացրել է հետեւյալ դասընթացները՝ «Առողջ ապրելակերպ», մասնակցել է 25 կին դատապարտյալ, որոնցից 15-ը ստացել են վկայականներ, «Սոցիալական ուսուցում եւ կյանքի հմտություններ»` 13 մասնակից, «Դեկորատիվ – կիրառական արվեստ»` 22 մասնակից, «Հիմնարար գրագիտություն» (հայոց լեզու եւ գրականություն, մաթեմատիկա)՝ անչափահաս կալանավորված եւ դատապարտված անձանց համար, ընդգրկվել է 4 անչափահաս կալանավորված անձ եւ 2 դատապարտյալ:
«Իրավական կրթության եւ վերականգնողական ծրագրերի իրականացման կենտրոն» ՊՈԱԿ-ը «Արմավիր» քրեակատարողական հիմնարկի սոցիալական, հոգեբանական եւ իրավական աշխատանքների բաժնի հետ համատեղ իրականացրել է «Խեցեգործություն եւ խեցեգործության թրծման, ներկման տեխնոլոգիա», «Ժամանակակից կիրառական արվեստ», «Փայտամշակում եւ փայտի գեղարվեստական փորագրություն», «Համակարգչային հմտությունների ուսուցում» եւ «Ռուսաց լեզվի տարրական գիտելիքներ» դասընթացներ, որոնց մասնակցել է 24 դատապարտյալ (2017թ. 1-ին կիս.՝ 27):
Ապրիլի 7-ին՝ մայրության եւ գեղեցկության տոնի կապակցությամբ, «Աբովյան» քրեակատարողական հիմնարկի կին դատապարտյալների համար կազմակերպվել է տոնական միջոցառում, իսկ երեխաների պաշտպանության միջազգային օրը ծնող-երեխա կապի ամրապնդման եւ զարգացման նպատակով՝ անչափահաս երեխաների հանդիպում իրենց մայրերի հետ:
Մայիսի 25-ին «Վարդաշեն» քրեակատարողական հիմնարկում անցկացվել է դատապարտյալ Ա.Օհանյանի ստեղծագործական աշխատանքների ցուցահանդես` նվիրված Առաջին Հանրապետության 100-ամյակին եւ մայիսյան եռատոնին:
Կալանավորված անձանց եւ դատապարտյալների հոգեւոր պահանջմունքների բավարարման նպատակով Հայ Առաքելական եկեղեցու կողմից պարբերաբար կատարվել են այցելություններ, մկրտություններ, պատարագներ, տոնական օրերին` տոնակատարություններ:
Հաշվետու ժամանակահատվածում դատապարտյալների զբաղվածությունն ապահովելու, սոցիալական վերականգնման արդիական եւ արդյունավետ միջոցառումներ ձեռնարկելու նպատակով, ինչպես նաեւ «Աջակցություն դատապարտյալին» հիմնադրամի հետ համատեղ 413 դատապարտյալ ներգրավվել է տարաբնույթ աշխատանքներում (2017թ. 1-ին կիս.՝ 387), այդ թվում՝ այլ գործատուների մոտ:
Ինքնագործ միավորումներում ընդգրկվել են 127-ը (2017թ. 1-ին կիս.՝ 175): Իրացվել է 142 դատապարտյալի կրթական իրավունքը ինչպես հանրակրթական, մասնագիտական, այնպես էլ բարձրագույն եւ հետբուհական (2017թ. 1-ին կիս.՝ 107):
Նույնականացման քարտեր եւ անձնագրեր տրամադրվել է 110 անձի (2017թ. 1-ին կիս.՝ 89):
