Եգիպտոսում վերջերս գտնված սեւ սարկոֆագի կարմրավուն հեղուկը համտեսելու թույլտվության պահանջով ստորագրահավաք է սկսվել change.org կայքում, հայտնում է «ՌԻԱ Նովոստի»-ն:
Ստորագրահավաքի հեղինակը բրիտանուհի Իննես ՄակՔենդրիքն է, որն առաջարկել է հեղուկից գազավորված էներգետիկ կոկտեյլ պատրաստել եւ բոլոր ցանկացողներին տալ համտեսելու: Ներկայումս հավաքվել է ավելի քան 8300 ստորագրություն:
Սեւ գրանիտից կնքված սարկոֆագը, որն անխաթար է մնացել եւ ավելի քան 2 հազար տարեկան է, հայտնաբերել են հուլիսի սկզբին Եգիպտոսի Ալեքսանդրիա քաղաքում շինարարական աշխատանքներ կատարելիս շենքերից մեկի տակ:
Ավելի ուշ սարկոֆագի մեջ հայտնաբերել են 3 վնասված մումիաներ, որոնք, ենթադրաբար, պատկանել են հնագույն մարտում զոհված ռազմիկների:
Կնքված սարկոֆագի գաղտնիքի վերաբերյալ բազմաթիվ լուրեր են հրապարակվել եգիպտական եւ եվոպական լրատվամիջոցներում: Ոմանք ենթադրել են, որ սարկոֆագը կարող էր պատկանել Ալեքսանդր Մակեդոնացուն, որի թաղման վայրը մինչ օրս անհայտ է:
