ԱՄՆ պետքարտուղար Մայք Պոմպեոն կիրակի երեկոյան Քալիֆորնիայում՝ Ռոնալդ Ռեյգանի հիմնադրամում հանդես է եկել ելույթով, որում խիստ քննադատության է ենթարկել Իրանի ներքին եւ արտաքին քաղաքականությունը՝ մեղադրելով երկրի ղեկավարությանը կոռուպցիայի եւ մարդու իրավունքների խախտումների մեջ, փոխանցում է «ՌԻԱ Նովոստի»–ն։
«Իրանի ղեկավարությունն ավելի շուտ մաֆիա է հիշեցնում, քան կառավարություն...ԱՄՆ–ն չի վախենում դիմակայել իրանական վարչակազմին ամենաբարձր մակարդակով»,–ասել է Պոմպեոն։
Որպես ապացույց նա բերել է տվյալներ այն մասին, թե ինչ ընկերություններ ու ունեցվածք ունի Իրանի ղեկավարությունը։ Ընդ որում, նա հատուկ շեշտել է, որ այդ ընկերությունների հաջողությունը հնարավոր է դարձել հենց կոռուպցիայի շնորհիվ, որը ստանում է երկրի ղեկավարության աջակցությունը։
«Նրանց գործունեությունը հանգեցրել է նրան, որ սովորական իրանցիները չեն կարող աշխատանք գտնել»,–հայտարարել է պետքարտուղարը։
Բացի այդ, Պոմպեոն ավանդական մեղադրանքներ է հնչեցրել իրանական վարչակազմի հասցեին՝ տարածաշրջանում ահաբեկչության եւ բռնության օժանդակման համար, ինչպես նաեւ երկրում մարդու իրավունքների բազմաթիվ խախտումների, այդ թվում` կրոնական փոքրամասնությունների, օրինակ, սուննիների, քրիստոնյաների, զրադաշտականների եւ այլ անձանց իրավունքների խախտումների համար:
