Գարեգին Բ Ամենայն Հայոց Կաթողիկոսը հուլիսի 22-ին, Մայր Աթոռ Սուրբ Էջմիածնի «Գարեգին Ա» կրթական կենտրոնում հանդիպել է աշխարհի 15 երկրներից Հայաստան ժամանած 62 սփյուռքահայ ուսուցիչների հետ, որոնք Խ. Աբովյանի անվան հայկական պետական մանկավարժական համալսարանի ռեկտոր Ռուբեն Միրզախանյանի եւ պրոֆեսորադասախոսական անձնակազմի նախաձեռնությամբ Հայաստանում մասնակցում են վերապատրաստման մեկամսյա դասընթացների:
Մայր Աթոռի տեղեկատվական համակարգից NEWS.am-ին հայտնում են, որ Ռուբեն Միրզախանյանը սփյուռքահայ ուսուցիչներին ներկայացրել է Վեհափառ Հայրապետի գործունեությունը կրթական ոլորտում: Նա տեղեկացրել է նաեւ, որ համալսարանի մի շարք ուսանողներ իրենց փորձառության շրջանը անցկացնում են Մայր Աթոռի հովանու ներքո գործող «Էօռնեկյան» հանրակրթական դպրոցում:
Նորին Սրբությունը գոհունակությամբ է արձանագրել, որ տարեցտարի Հայաստան ժամանող սփյուռքահայ ուսուցիչների թիվը մեծանում է:
Բարձրորեն գնահատելով սփյուռքահայ ուսուցիչների նախանձախնդրությունը` Վեհափառ Հայրապետը շեշտել է, որ մանկավարժները կարեւոր պատասխանատվություն են կրում այսօրվա եւ գալիք սերունդների դաստիարակության ու կրթության համար: Նորին Սրբությունը հույս է հայտնել, որ այցը Հայաստան եւ մասնակցությունը դասընթացին նորանոր լիցքեր կհաղորդի նրանց` նոր ուժով եւ ավյունով շարունակելու ուսուցչական իրենց բարդ ու դժվարին առաքելությունը:
Զրույցի ընթացքում Գարեգին Բ Հայրապետն անդրադարձել է նաեւ Սփյուռքի առջեւ ծառացած արդի մարտահրավերներին՝ մասնավորապես խոսելով հայապահպանության, հայեցի դաստիարակության, ինչպես նաեւ մատաղ սերնդի մեջ աստվածսիրություն եւ հայրենասիրություն սերմանելու կարեւորության մասին: Մարտահրավերների հաղթահարման գործում Ամենայն Հայոց Կաթողիկոսը կարեւորել է համագործակցությունը եկեղեցական կառույցների եւ ազգային կրթական հաստատությունների միջեւ:
Այս առիթով Նորին Սրբությունը ներկաներին տեղեկացրել է «Գարեգին Ա» կրթական կենտրոնում Մայր Աթոռի կողմից Հայ Եկեղեցու քահանաների համար նախաձեռնված վերապատրաստման դասընթացների մասին` հավելելով, որ առաջիկա տարի նախատեսվում է կազմակերպել վերապատրաստման դասնթացներ ԱՄՆ Հայոց Արեւելյան թեմի ուսուցիչների համար:
Հանդիպմանը ներկա է եղել Մայր Աթոռ Սուրբ Էջմիածնի Հոգեւոր-կրթական հաստատությունների վերատեսուչ Գերաշնորհ Տ. Գեւորգ եպիսկոպոս Սարոյանը: