ԱՄՆ պետքարտուղար Մայքլ Պոմպեոյի հակաիրանական հայտարարությունները Իրանի ներքին գործերին ԱՄՆ-ի ակնհայտ միջամտություն են: Այս մասին հայտարարել է Իրանի ԱԳՆ պաշտոնական ներկայացուցիչ Բահրամ Ղասեմին, փոխանցում է ՏԱՍՍ-ը:
«Այդ ելույթը Իրանի ներքին գործերին ԱՄՆ-ի ակնհայտ միջամտություն է եւ ընթանում է տարածաշրջանում իրավիճակի ապակայունացման նախկին քաղաքականության հունով, ինչպես նաեւ վկայում է Վաշինգթոնի կողմից միջազգային պարտավորությունների խախտման մասին»,- ասել է Ղասեմին: Նա նաեւ նշել է, որ «պետքարտուղարի հայտարարությունը ոչ այլ ինչ է, եթե ոչ քարոզչություն»:
«Ավելի շատ, քան երբեւէ այս հայտարարությունը վկայում է միջուկային գործարքից դուրս գալուց հետո ստեղծված իրավիճակում ԱՄՆ բացարձակ անօգնականության եւ գտնվելով միջազգային մեկուսացման մեջ՝ իր նպատակներին հասնելու անընդունակության մասին»,- հավելել է դիվանագետը:
Կիրակի Պոմպեոն հանդես էր եկել Վենտուրա շրջանում (Քալիֆորնիա նահանգ) ԱՄՆ նախկին նախագահ Ռոնալդ Ռեյգանի գրադարանում: Պետքարտուղարը խիստ քննադատության էր ենթարկել Իրանի ներքին եւ արտաքին քաղաքականությունը եւ Իրանի բարձրագույն ղեկավարությանը համեմատել մաֆիոզ կառույցի հետ, կոռուպցիայի մեջ մեղադրել Իրանի ղեկավար եւ հոգեւոր առաջնորդ այաթոլլահ Ալի Խամենեիին:
