Ռուսաստանում ուժեր են հայտնվել, որոնք իրենց պարտքն են համարել Փանիկ գյուղի միջադեպն օգտագործել հայկական կողմին սադրանքների մեջ մեղադրելու համար: Այս մասին հուլիսի 23-ին լրագրողների հետ հանդիպման ժամանակ ասաց Ազգային ինքնորոշում միավորման ղեկավար Պարույր Հայրիկյանը:
Նրա խոսքով՝ վարչապետ Նիկոլ Փաշինյանը բավական զուսպ արձագանքեց տեղի ունեցածին, եւ ռուսական կողմին հայ վարչապետի դիրքորոշումը չի բավարարել, քանի որ նրանից սպասում են իրենց շահերին լիակատար հպատակություն:
«Այս բացահայտումը տեղի է ունեցել այդ բոլոր հանգամանքների պարագայում: Հասկացող մարդիկ եզրակացություններ կանեն, իսկ չհասկացողները կշարունակեն ցույց տալ, որ չեն հասկանում: Դա նրանց իրավունքն է»,- պարզաբանեց Հայրիկյանը:
Հիշեցնենք, որ հուլիսի 17-ին Փանիկ գյուղի բնակիչները կրակոցների եւ պայթյունների ձայն էին լսել: Որոշ ժամանակ անց պարզվել էր, որ կրակոցների հեղինակները Գյումրիի 102-րդ ռուսական ռազմաբազայի զինծառայողներ են: 102-րդ ռուսական ռազմաբազայի հրամանատար, ռուս գնդապետ Վլադիմիր Էլկանովը ՀՀ պաշտպանության նախարար Դավիթ Տոնոյանին ներկայացրել է միջադեպի մանրամասները: Նրա խոսքով՝ հայկական կողմի հետ համաձայնեցված միջոցառումն ընդգրկվել էր 2018 թվականի բազայի ռազմական պատրաստվածության ծրագրում: Նշվել է նաեւ, որ հրամանատարությունը սահմանված կարգով տեղեկացրել է լիազորված մարմիններին: Սակայն, հաշվի առնելով, որ զորավարժությունների անցկացման վայրի ընտրության ժամանակ հաշվի չեն առնվել այն հանգամանքները, որոնք անհանգստություն են պատճառել տեղի բնակչությանը, ռուսական կողմը պաշտոնական ներողություն է հայտնել եւ հավաստիացրել է, որ այսուհետ ավելի հետեւողական կլինի բազայից դուրս անցկացվող միջոցառումների պլանավորման եւ իրազեկման հարցերում: