Առաջնագծում զինծառայողը ջրի խնդիր չունի, կրկնակի ջուր է տարվում, իսկ լողանալն էլ շաբաթը մեկ անգամ կազմակերպվում է հենց առաջնագծում։ Այս մասին այսօր՝ հուլիսի 24-ին, Ստեփանակերտում, լրագրողների հետ հանդիպման ժամանակ նշեց Արցախի պաշտպանության նախարար Լեւոն Մնացականյանը:
Նրա խոսքով, զինվորները ընդամենը 100 կամ 200 մետր են գնում ջրի համար. «Առհասարակ ջրամատակարարման հարցը լուծում ենք, իսկ առաջնագծում զինծառայողը ջրի խնդիր չունի, կրկնակի ջուր է տարվում, իսկ լողանալն էլ շաբաթը մեկ անգամ կազմակերպվում է հենց առաջնագծում»,-ասաց նախարարը:
Ինչ վերաբերում է 14-օրյա մարտական հերթապահության մասին հարցին, նա նշեց որ ուսումնասիրություններ են կատարվում եւ այս պահի դրությամբ ճիշտը 14 օրն է:
Լեւոն Մնացակնյանը խոսեց նաեւ պայմանագրային զինծառայողների աշխատավարձի մասին՝ նշելով. «Շատ լավ կլինի որ բոլորի աշխատավարձերն էլ բարձր լինեն։ Չէի ասի որ ցածր են շարքային պայմանագրային զինծառայողների աշխատավարձերը՝ կապված ինչ պաշտոն է զբաղեցնում ու որտեղ է անցկացնում մարտական հերթապահությունը»:
