ՀՀ վարչապետ Նիկոլ Փաշինյանի եւ եւ ՀՀ պաշտպանության նախարար Դավիթ Տոնոյանի որդիները, առհասարակ բոլոր նորակոչիկները, երջանիկ են, որ ծառայում են Արցախում։ Այս մասին այսօր՝ հուլիսի 24-ին, Ստեփանակերտում, լրագրողների հետ հանդիպման ժամանակ նշեց Արցախի պաշտպանության նախարար Լեւոն Մնացականյանը:
«Փաշինյանի ու Տոնոյանի որդիները ֆիզիկապես պատրաստ են, շատ բան չենք կարող ասել, բնականաբար։ Արցախի նախագահի որդին, իմ որդին, Արշավիր Ղարամյանի որդին ծառայել են Պաշտպանության բանակում։ Այսօր ծառայում են բանակում դատախազի, քաղաքապետների, հրամանատարների որդիներ»,-հայտարարեց Լեւոն Մնացականյանն ու վստահեցրեց. «Չեք կարող նշել Արցախում մի դեպք, որ այսինչի որդին չի ծառայել, որովհետեւ պաշտոնյայի որդի է»:
Ավելի վաղ NEWS.am-ը հայտնել էր, որ ՀՀ վարչապետ Նիկոլ Փաշինյանի եւ եւ ՀՀ պաշտպանության նախարար Դավիթ Տոնոյանի որդիները զորակոչվել են բանակ եւ ծառայությունն անցնում են Արցախում: Փաշինյանի որդին ինքն էր ցանկություն հայտնել հենց Արցախում ծառայել, իսկ Տոնոյանի որդու դեպքում վիճակահանությամբ է ծառայության վայր ընտրվել Արցախը:
