Վերջին ամիսներին հայկական կողմը քանիցս հայտնել է ԼՂՀ շփման գծում ադրբեջանական ուժերի կուտակումների եւ հայ-ադրբեջանական սահմանի նախիջեւանյան հատվածի չեզոք գոտում առաջխաղացումների մասին: Այս կապակցությամբ NEWS.am-ի թղթակիցը դիմեց ԵԱՀԿ գործող նախագահի անձնական ներկայացուցիչ Անջեյ Կասպրշիկին՝ իրավիճակը մեկնաբանելու խնդրանքով:
Վերջին շրջանում լարվածությունը մեծացել է հայ-ադրբեջանական սահմանի նախիջեւանյան հատվածում: Սրա հետ կապված արդյոք նախատեսվո՞ւմ է այս ուղղությամբ մշտադիտարկման անցկացում:
Վերջին տարիների ընթացքում իմ գրասենյակը մի շարք դիտարկումներ է կատարել սահմանի Նախիջեւանի հատվածում:
Մենք, ինչպես նախկինում, բոլոր ջանքերը գործադրում ենք, որպեսզի այցելենք սահմանի եւ շփման գծի բոլոր այն հատվածները, որոնց վերաբերյալ տարածվում են հրադադարի խախտման տեղեկություններ:
Ինչպե՞ս եք գնահատում իրավիճակը, երբ կողմերից մեկը կրճատում է չեզոք գոտին, դիրքերն առաջ է բերում, դա օգտագործում է քարոզչության եւ ռազմական հռետորաբանության նպատակով: Ձեր կարծիքով՝ ընդհանրապես որքանո՞վ են կարեւոր չեզոք գոտու վերաբերյալ նման մտադրությունները: Նաեւ արդեն առաջին ամիսը չէ, որ հայկական կողմը հայտարարում է Հայաստանի սահմանին եւ Լեռնային Ղարաբաղի հետ շփման գոտում ադրբեջանական ուժերի կուտակումների մասին: Ինչպե՞ս եք գնահատում այսպիսի տեղեկությունները:
Հարկ է խուսափել համանման խախտումներից, ինչպես նաեւ գործողություններից, որոնք հանգեցնում են լարվածության մեծացման կամ մեծացնում են ռազմական գործողությունների հավանականությունը մերձճակատային շրջաններում:
Ցավով ստիպված ենք արձանագրել, որ հրադադարի ռեժիմի խախտումների թիվը տարեցտարի մեծանում է: Ինչպե՞ս է հնարավոր կողմերին պարտադրել համաձայնագրի կատարումը:
Վերջին մի քանի ամիսներին կողմերը հայտնել են հրադադարի խախտումների համեմատաբար ցածր մակարդակի մասին: Կողմերը նաեւ չեն հայտնել առավել մահաբեր զենքի կիրառման մասին, ինչպիսին են ականանետերն ու նռնականետերը:
Անցյալում ակտիվորեն քննարկվում էր առաջնագծից դիպուկահարներին հետ տանելու հարցը: Դա հնարավո՞ր է:
Առաջնագծում կայուն իրավիճակը եւ կորուստների ցածր մակարդակը լավ հեռանկար է ստեղծում երկխոսության վերսկսման համար: Մեր գրասենյակը շարունակում է կողմերի աջակցությամբ ճակատային գծի կանոնավոր մշտադիտարկումը, ինչը մեզ թույլ է տալիս կատարել մանդատով նախատեսված մեր խնդիրները:
Ո՞ր փուլում է Ձեր խմբի ընդլայնման հարցի լուծումը:
Այն բանից հետո, երբ նախագահները համաձայնվեցին իմ գրասենյակի ընդլայնմանը, մանրամասները ԱԳ նախարարները քննարկել են 2018 թվականի հունվարին Կրակովում: Նրանք սկզբունքորեն համաձայնվել են գրասենյակի ընդլայնումն իրականացնելու նախնական ծրագրին, սակայն, այնուամենայնիվ, դեռ որոշ մանրամասներ պետք է համաձայնեցնել:
Մենք՝ իմ աշխատակիցների հետ պատրաստ ենք կողմերին աջակցել վստահության ամրապնդմանն ուղղված ցանկացած համաձայնեցված միջացառումների իրականացման գործում:
