Թուրքական ժամանակակից «Ալթայ» տանկը կարող է Արդրբեջան արտահանվել։ NEWS.am-ի թղթակցի հետ զրույցում այսպիսի կարծիք հայտնեց ռուսական Քաղաքական եւ ռազմական վերլուծության ինստիտուտի փոխտնօրեն Ալեքսանդր Խրամչիխինը՝ պատասխանելով Ադրբեջանի կողմից ժամանակակից թուրքական տանկերի գնման եւ ռուսական ու արտասահմանյան ժամանակակից տանկերի համեմատությամբ առավելությունների մասին հարցին։
Նրա խոսքով՝ անցած ամբողջ դարում Թուրքիան ինքն է տանկեր գնել արտասահմանում՝ ԽՍՀՄ-ում, Ֆրանսիայում, Մեծ Բրիտանիայում, Գերմանիայում, ԱՄՆ-ում եւ այլն։ Սակայն ժամանակի ընթացքում մեքենաշինության թուրք մասնագետները կարողացան յուրացնել տանկերի արդիականացման հիմքերը։ «Այսպես, բավարար վիճակի բերվեցին նրանց սպառազինության մեջ եղած գերմանական «Լեոպարդները» եւ ամերիկյան «М60»-ը։ Սակայն 21-րդ դարի սկզբին Թուրքիայում հանգեցին սեփական տանկ ստեղծելու անհրաժեշտության եզրակացությանը, առավել եւս, որ նման քայլի դրական կողմերը մեծաթիվ էին»,- պարզաբանեց Խրամչիխինը։
Նա արձանագրեց, որ թուրքերի համար սեփական տանկն ավելի էժան էր, քան գերմանական «Leopard»-ների, ֆրանսիական «Leclerc»-ների եւ համանման այլ տեխնիկայի լիցիենզիոն արտադրությունը։ Դրանից բացի, տարածաշրջանում առաջատար դերակատարման հավակնող երկիրը պետք է պաշտպանական տեխնիկայի մշակման ոլորտում բանատեղյակություն ունենար։ «Ապագա տանկը կարող է անգամ արտահանվող շահութաբեր ապրանք դառնալ, քանի որ Թուրքիան վաղուց եւ բավական հաջող զենք է վաճառում»,- նշեց ռուս ռազմական փորձագետը։
Նա պարզաբանեց, որ թուրքական ամենաժամանակակից «Ալթայ» տանկը խորապես արդիականացված եւ պարզեցված կորեական «К2»-ն է, քանի որ տեխնոլոգիաների մինչեւ 60 տոկոսը ուղղակիորեն փոխառված են «Սեւ հովազից»։ Թուրքական տանկի արժեքն անցել է 5 մլն դոլար նիշից։ «Ի դեպ, ինչպես եւ նրանց կորեացի գործընկերները, թուրք ինժեներները ոչ մի նոր բան չեն ստեղծել, քանի որ այս տանկի հորինվածքը միանգամայն դասական է, որի մեջ ոչ մի յուրահատուկ բան չկա»,- հավելեց ռազմական փորձագետը։
Նրա գնահատմամբ՝ լույս աշխարհ գալով «Ալթայն» արդեն հնացել է, քանի որ տանկի ո՛չ թնդանոթը, ո՛չ պաշտպանական համակարգերը, ո՛չ ուժային սարքը չեն համապատասխանում զրահատեխնիկային առաջադրվող ժամանակակից հեռանկարային պահանջներին, իսկ թուրքական մեքենայի մակարդակը գրեթե հավասար է 2000-ականների սկզբի ռուսական Տ-90 տանկի մակարդակին։
Փորձագետը չբացառեց, որ «Ալթայը» միանգամայն կարող է արտահանվել, իսկ գնորդների թվում հնարավոր հավակնորդ կդառնան Ադրբեջանը, Պակիստանը եւ Պարսից ծոցի երկրները։ «Մնացել է միայն մի փոքրիկ հաղթական պատերազմ վարել՝ ցույց տալու համար այս տանկի ամբողջ հզորությունը»,- եզրափակեց ռուս ռազմական փորձագետը։
