Հայաստանում տնտեսական գործունեության համար նախկինում առկա խոչընդոտները վերացված են: Այս մասին այսօր՝ հուլիսի 26-ին Սանկտ Պետերբուրգում ռուսաստանաբնակ հայ գործարարների հետ հանդիպմանը հայտարարել է ՀՀ վարչապետ Նիկոլ Փաշինյանը՝ նրանց հրավիրելով Հայաստանում տնտեսական գործունեություն ծավալելու։
«Այս խոչընդոտների մեջ ամենակարեւորներից մեկը եղել է եւ տեղ–տեղ շարունակում է մնալ կոռուպցիան, չնայած, ընդհանուր առմամբ, Հայաստանում կոռուպցիա չկա, դրանք «հետցնցումներն» են, մնացորդային երեւույթներ են»,- նշել է նա։
Փաշինյանի խոսքով՝ կոռուպցիայի դեմ պայքարը շարունակվելու է. «Հայաստանում գիտեք, որ ակտիվ պայքար է գնում կոռուպցիայի դեմ, եւ այդ պայքարը շարունակվելու է։ Իհարկե, կոռուպցիայի դեմ պայքարն առնչվում է որոշակի ընկերությունների եւ մեզ համար շատ կարեւոր է, որ կոռուպցիայի դեմ պայքարը չընկալվի որպես արշավ ընդդեմ բիզնեսի»։
Վարչապետը նշել է, որ կառավարությունը երաշխավորում է ներդրումների անվտանգությունը. «Ներդրումների անվտանգություն ասելով՝ հասկանում ենք ոչ միայն այն, որ պետական որեւէ մարմին չի կարող այդ ներդրումը «ջարդել», փոշիացնել, այլ նաեւ նկատի ունենք, որ որեւէ մեկը չի կարող «փայ մտնել», «նալոգ» դնել եւ այս կարգի այլ երեւույթներ»։
Նա հավելել է, որ ՀՀ կառավարության շահագրգռվածությունն ունի 2 պատճառ. «Առաջինը, որ մենք ցանկանում ենք, որ Հայաստանում ստեղծվի աշխատատեղեր, երկրորդը՝ աճեն պետական եկամուտները»։
Փաշինյանը վերահաստատել է, որ Հայաստանում բիզնեսն ազատված է կոռուպցիոն որեւէ պարտավորությունից: «Վարչապետ ընտրվելուց հետո մեկ շաբաթվա ընթացքում գործարարների տարբեր խմբերի հետ հանդիպումների ընթացքում պաշտոնապես հայտարարել եմ, որ այս պահից սկսած՝ ցանկացած բիզնես ազատվում է կոռուպցիոն որեւէ պարտավորությունից։ Եվ այս առումով բացառում եմ, որ որեւէ ընկերության նկատմամաբ տեղային մակարդակով ձեզ հայտնի շրջանակները որեւէ ձեւով կփորձեն միջամտել»,- հավաստել է նա։
