Միացյալ ազգերի կազմակերպությունը ֆինանսական դժվարություններ է կրում՝ պայմանավորված անդամ պետությունների անդամավճարների չվճարմամբ: «Մեր կանխիկ պահուստները դեռեւս երբեք այդքան քիչ չեն եղել տարվա այսպիսի վաղ ժամանակահատվածում»,- ՄԱԿ գլխավոր քարտուղար Անտոնիու Գուտերեշը իրավիճակը ներկայացրել է կազմակերպության անդամներին հղած ուղերձում, հայտնում է «Գերմանական ալիքը»:
Գուտերեշի խոսքով՝ ընթացիկ տարվա հունիսի վերջին ՄԱԿ բյուջեում պակասուրդը կազմել է 139 մլն դոլար: Այնպիսի մակարդակի կազմակերպությունը, ինչպիսին ՄԱԿ-ն է, կարող է հայտնվել սնանկացման սպառնալիքի տակ, զգուշացրել է նա՝ կոչ անելով վճարել անդամավճարները:
ՄԱԿ-ի մեջ մտնող 193 պետություններից հուլիսին անդամավճարները վճարել էին միայն 112-ը, ըստ որում՝ խոշորագույն դոնոր ԱՄՆ-ն, որին բաժին է ընկնում ՄԱԿ բյուջեի մոտ 22 տոկոսը, դեռեւս անհրաժեշտ միջոցները չի փոխանցել: Գերմանիան, հակառակը, մտնում է անդամավճարները վճարած երկրների ցանկի մեջ: ԱՄՆ-ից եւ Գերմանիայից բացի, խոշորագույն դոնորների մեջ են մտնում Ճապոնիան եւ Չինաստանը:
ՄԱԿ 2018-2019 թվականների բյուջեն մոտ 5,4 մլրդ դոլար է (4,6 մլրդ եվրո), որը հավանություն է ստացել 2017-ի դեկտեմբերյան ասամբլեայում: Այս գումարի մեջ չեն մտնում այն միջոցները, որոնք ՄԱԿ-ն ծախսում է խաղաղապահ գործողությունների համար՝ այս բյուջեն 2018-2019 թվականներին կազմում է մոտ 6,7 մլրդ դոլար (5,8 մլրդ եվրո): Խաղաղության աջակցության գործողությունների ֆինանսական տարին տեւում է հուլիսի 1-ից հունիսի 30-ը, հստակեցված է ՄԱԿ կայքում: