Երկիր մոլորակի բնակիչները հուլիսի 27-ին կարող են ականատես լինել 21-րդ դարի ամենաերկար Լուսնի ամբողջական խավարմանը:
Օրինակ՝ Ռուսաստանում աստղագիտական այս երեւույթը անզեն աչքով նկատելի է երկրի գրեթե ամբողջ տարածքում՝ Մոսկվայի ժամանակով 21:24-ից մինչեւ 01:20-ը:
ՌԳԱ Կիրառական աստղագիտության ինստիտուտի ավագ գիտաշխատող Նիկոլայ Ժելեզնովը Sputnik ռադիոկայանի եթերում ասել է, որ Լուսնի խավարումը ոչ մի կերպ չի անդրադառնա մարդկանց առողջության վրա: Նա, միաժամանակ, ուշադրություն է հրավիրել այն հանգամանքի վրա, որ ուրբաթ երեկոյան հնարավոր է հետեւել եւս մեկ երեւույթի:
«Հետաքրքիր է, որ Լուսնի այս խավարումը համընկել է Մարսի Մեծ դիմակայության հետ: Այսօր երեկոյան, պարզ եղանակի դեպքում, «Արյունոտ Լուսնից» քիչ հեռու հնարավոր կլինի տեսնել վառ կարմիր աստղ. դա Մարսն է»,- նշել է գիտաշխատողը: