Սահմանադրական իրավունքում եւ Մարդու իրավունքների եվրոպական կոնվենցիայում ամրագրված դրույթներով ենթադրվում, էր չի կարելի մարդուն որպես վկա կանչել, եթե դու գիտես, որ ինքը կասկածյալ է. ըստ էության, իրավապահ մարմինները չպետք է խաբեն քաղաքացինոերին: Այս մասին այսօր՝ հուլիսի 28-ին, լրագրողների հետ հանդիպման ժամանակ նշեց ՀՀ երկրորդ նախագահ Ռոբերտ Քոչարյանի փաստաբան Արամ Օրբելյանը:
Նա նշեց, որ գործի նյութերում նշված է, որ կոնկրետ անձը ասում է, որ լսել է, որ ինչ-որ մեկը ասել է ինչ-որ բան. «Ու անուն-ազգանուն չկա, հենց գրված է, որ ինչ-որ մեկն է ասել: Մենք ասում ենք, ժողովուրդ ջան, միգուցե ձեր միջնորդությունը հիմա չքննարկենք: Գործը պետք է քննվի, բացահայտվի: Մարտի 1-ի գործի չբացահայտելն ամբողջությամբ Հայաստանի զարգացման համար խնդիրներ է առաջացնում:
Օրբելյանն ասաց, որ ինքն անձամբ մինչեւ վերջ չի հասկանում, թե ինչում են մեղադրում Քոչարյանին. «Ինչ-որ փաստեր են նշված եւ մեջբերվում է 300.1 հոդվածը: Մոտավորապես նույնն է, որ ասեն՝ Արամ Օրբելյանը առավոտյան վեր կացավ, գնաց ցնցուղ ընդունեց, սափրվեց, իջավ նստեց ավտոմեքենա, ճանապարհին բենզին լցրեց եւ դրա համար ինքը մեղադրվում է գողության համար: Մոտավորապես նման տեքստ է: Որեւէ պատճառահետեւանքային կապ չկա, ես չեմ կարողանում հանցագործության էլեմենտը մինչեւ վերջ հասկանալ, որ դետալացված կարողանամ քննարկել: Մինչեւ վերջ չեմ հասկանում՝ մեղադրվում է զորք օգտագործելո՞ւ մեջ, արտակարգ իրավիճակ մտցնելո՞ւ մեջ: Չի կարող արարքը հստակ չլինի: Այսինքն մինչեւ վերջ չենք կարողանում հասկանալ, թե որ արարքն է, որ հիմք է դարձել՝ արտակարգ դրություն մտցնելու հրամանագիրն է, ինչ-որ խորհրդակցություն անելու որոշումն է: Ի՞նչն է կոնկրետ, չկա, գրված չէ, թե հստակ որ արարքն է, որ կարողանանք վիճել կամ չվիճել: Որ կարողանանք ասել՝ այդ արարքը հանցանք համարվում է, թե ոչ: Գործը բավարար ուսումնասիրված ու մշակված չէ քննչական մարմինների կողմից: Այսինքն կան բազմաթիվ գործղություններ, որոնք պետք է կատարվեն, կամ գործը լավ ուսումնասիրված է, բոլոր գործողությունները կան, բայց դատարան ներկայացվել են միայն նրանք, որոնք ինչ-որ ձեւով կարող է ինչ-որ բան ենթադրվել»- ասաց փաստաբանը:
Նա ընդգծեց, որ այդ ապացույցների մեջ Ռոբերտ Քոչարյանի մասով որեւէ բան չկա, որեւէ ապացույց չկա. «Առաջադրված հոդվածի՝ 300.1-ի եւ կոնկրետ արարքների միջեւ կապը չենք կարողանում հասկանալ»:
