Իրանի ԱԳՆ-ն բացառել է մոտ ապագայում ԱՄՆ-ի հետ բանակցությունները, քանի որ Վաշինգթոնը Թեհրանի նկատմամբ թշնամական քաղաքականություն է վարում: Այս մասին երկուշաբթի հայտարարել է Իրանի ԱԳՆ պաշտոնական ներկայացուցիչ Բահրամ Ղասեմին, հայտնում է Fars գործակալությունը:
«ԱՄՆ քաղաքականությունը հնարավորություն չի տալիս որեւէ փոխգործակցության եւ բանակցությունների համար: Վաշինգթոնը ցույց է տվել, որ վստահության արժանի չէ»,- ասել է Ղասեմին:
Պատասխանելով ԱՄՆ-ի հետ բանակցություններ սկսելու հնարավորության մասին հարցին, դիվանագետը նշել է, որ «հավանաբար, ԱՄՆ որոշ ներկայացուցիչներ նման ցանկություն հայտնում են»: «Սակայն, հաշվի առնելով ստեղծված իրավիճակը եւ Վաշինգթոնի շարունակվող թշնամական քաղաքականությունը, դրա համար ոչ մի նախադրյալ չկա»,- հավելել է նա:
Անցած երեքշաբթի ԱՄՆ նախագահ Դոնալդ Թրամփը հայտարարել էր, որ պատրաստ է Իրանի իշխանությունների հետ միջուկային ոլորտում «իսկական գործարք» կնքել, որը կտարբերվի «նախորդ ձախողվածից»: