Քաղաքական վարք ձեւավորելիս Ադրբեջանը հաշվի չի առնում միջազգային քաղաքակիրթ մեթոդները: Այս մասին հունվարի 31-ին կայացած ասուլիսում ասաց Ադրբեջանահայերի լիազոր ներկայացուցիչների կազմակերպական կոմիտեի անդամ Արարատ Ծատուրյանը: Նրա խոսքով, վերջին ժամանակներս պաշտոնական Բաքուն էլ ավելի է ուժգնացրել ճնշումը ազգային փոքրամասնությունների եւ «ընդունվածից տարբերվող» կրոնական համայքների նկատմամբ:
Ծատուրյանն ասել է, որ այդ առումով, իրեն անհանգստացնում է միջազգային կառույցների անգործությունը, նշելով, մասնավորապես, ՄԱԿ-ը:
«Մեզ անհանգստացնում է, որ ՄԱԿ-ը չի արձագանքում ազգային եւ կրոնական ատելությանը, որը հրահրվում է Ադրբեջանում Ղարաբաղյան պատերազմում պարտությունից հետո»,- ընդգծել է նա:
Ամփոփելով, Ծատուրյանը տեղեկացրել է, որ մամուլի ասուլիսից հետո իրենք մտադիր են ՄԱԿ-ի Երեւանի գրասենյակ նամակ տանել, որն ուղղված է ՄԱԿ-ի Անվտանգության խորհրդին: Նամակում նշված են բոլոր մտահոգությունները, ինչպես նաեւ միջազգային կառույցների միջամտության անհրաժեշտությունը: