Նիկոլ Փաշինյանի «Քաղաքացիական պայմանագիր» կուսակցությունն ընտրեց Երեւանի քաղաքապետի իր թեկնածուին: Հուլիսի 29-ին հրավիրված վարչության նիստում կուսակցության անդամները 4 թեկնածուներից նախապատվությունը տվել են դերասան Հայկ Մարությանին՝ «Կարգին Հայկոյին»:
Ալեն Սիմոնյանի խոսքով՝ առայժմ ընտրել են «Քաղաքացիական պայմանագրի» ընտրացուցակի առաջին համարին, բայց դեռ որոշում չունեն, ավագանու արտահերթ ընտրություններին մասնակցելու են միայնակ, թե՞ «Ելք» դաշինքի հետ միասնական ընտրացուցակով: Իսկ Հայկ Մարությանն ընտրվելու դեպքում, իր խոսքով, «թեւերը քշտած» զբաղվելու է մայրաքաղաքի խնդիրների լուծմամբ:
Հիշեցնենք, որ Երեւանի ավագանու արտահերթ ընտրությունների անհրաժեշտություն առաջացավ Տարոն Մարգարյանի հրաժարականից եւ ավագանու հուլիսի 16-ի նիստում քաղաքապետի ընտրության տապալումից հետո: Արտահերթ ընտրություններին մասնակցության որոշում ՀՀԿ-ն դեռ չունի, «Երկիր Ծիրանիի» քաղաքապետի թեկնածուն Զարուհի Փոստանջյանն է, իսկ ընտրություններին մասնակցելու մասին հայտարարած Գագիկ Ծառուկյանի «Բարգավաճ Հայաստան» կուսակցությունը դեռ թեկնածու չունի: Սակայն, ըստ լուրերի, այդ պաշտոնում առաջադրելու են պատգամավոր Նաիրա Զոհրաբյանին:
Մարտի 1-ի գործով Հայաստանում սահմանադրական կարգը տապալելու համար մեղադրվող հանրապետության երկրորդ նախագահ Ռոբերտ Քոչարյանը երկու ամսով կալանավորվեց, իսկ ՀԱՊԿ գլխավոր քարտուղար Յուրի Խաչատուրովին 5 մլն դրամ գրավի դիմաց ազատ արձակեցին:
Քոչարյանի գրասենյակի ղեկավար Վիկտոր Սողոմոնյանը կարծում է՝ երկրորդ նախագահին կալանավորելու որոշումն անօրինական է, նրա դեմ տեղի ունեցածը՝ անձնական հաշվեհարդար:
Մեղադրանքի առաջադրումն ու կալանավորման որոշումը պատվեր է համարում նաեւ Ռոբերտ Քոչարյանի պաշտպաններից Ռուբեն Սահակյանը: Իսկ մեղավորները, ըստ նրա, դատախազությունում եւ Հատուկ քննչական ծառայությունում են:
Ռուբեն Սահակյանը հիշեցրեց, որ Ռոբերտ Քոչարյանին հուլիսի 26-ին ՀՔԾ էին հրավիրել՝ որպես վկա հարցաքննելու, բայց հենց այդ ժամանակ էլ հայտնել են, որ որոշել են մեղադրանք առաջադրել: Դրանից հետո երկրորդ նախագահը հրաժարվել է ցուցմունք տալ, թեեւ, պաշտպանի հավաստմամբ, որոշել էին ցուցմունք տալ: Փաստաբանը նաեւ կարծում է, որ եթե Նիկոլ Փաշինյանը միջամտի, Ռոբերտ Քոչարյանին հեշտ կլինի արդարացնել:
Երեւանում ողբերգական դեպք է տեղի ունեցել. Ներքին Չարբախում հրդեհի հետեւանքով 6-ամյա երեխա է մահացել: Հրդեհը բռնկվել է թաղամասի զինվորական հավաքակայանի մոտ, խոտի դեզ է այրվել:
Հարեւանները պատմել են, որ ողբերգության պահին ծնողները տանը չեն եղել: Ընտանիքի մյուս երեխան՝ 8-9 տարեկան տղան, օգնության է կանչել հարեւաններին՝ ասելով, որ փոքր եղբայրը դեզի մեջ է: Սակայն մինչեւ օգնության են հասել, 6-ամյա տղան արդեն մահացած է եղել: Հարեւանները ենթադրում են, որ երեխան ինքն է վառել խոտը, եւ այրվող դեզն ընկել է նրա վրա: Հրդեհի առաջացման պաշտոնական վարկած, սակայն, դեռեւս չկա:
Սոչիում բռնկված հրդեհի հետեւանքով 8 մարդ է զոհվել, այդ թվում՝ 4 հայ: 11 տուժածների թվում նույնպես հայեր կան: Զոհվածներից մեկը Հայաստանի քաղաքացի է՝ 1950 թվականին ծնված Նիրվարդ Հարությունյանը: Մյուս զոհերը շենքի տերերն են՝ միեւնույն ընտանիքի անդամներ՝ Նաիրա, Եվա եւ Աննա Բարսեղյաններ: Ընտանիքի հայրը՝ Արթուր Բարսեղյանը, հիվանդանոցում է:
Հրդեհը բռնկվել է վաղ առավոտյան, երեք հարկանի կիսակառույց շենքում: Զոհվածների մի մասը քնած ժամանակ խեղդվել է ծխից: Քննիչների տվյալներով՝ շենքի կառուցման ժամանակ, ամենայն հավանականությամբ, հրավտանգ նյութեր են օգտագործվել, ինչի արդյունքում կրակը շատ արագ է տարածվել: Պատահարի փաստով քրեական գործ է հարուցվել:
Հետախուզման մեջ գտնվող քրեական հեղինակություն Արամ Վարդանյանին Արաբական Միացյալ Էմիրություններում են հայտնաբերել: «Վստրեչի ապեր» մականունով հայտնի Վարդանյանին հայտնաբերել եւ ձերբակալել են Դուբայի օդանավակայանում: Հիմա երկու երկրների իրավապահները կազմակերպում են Վարդանյանի արտահանձնման գործընթացը: Հավելենք, որ Արամ Վարդանյանը մեղադրվում է զենքի գործադրմամբ քաղաքացու առեւանգում կազմակերպելու եւ ղեկավարելու համար:
Հուլիսի 30-ին դոլարն արժեզրկվել է, եվրոն՝ շուրջ 3 դրամով թանկացել: Դոլարի փոխարժեքը կազմել է 480 դրամ, եվրոյինը՝ 561, ռուբլունը՝ 7 դրամ 68 լումա, ֆունտինը՝ 631 դրամ:
Հուլիսի 31-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Ուլտրամանուշակագույն ճառագայթման ինդեքսը՝ 6: Երեւանում վաղը քաղաքի առանձին հատվածներում հնարավոր են տեղումներ: Մայրաքաղաքում գիշերը կդիտվի +24+26, ցերեկը՝ +40+42 աստիճան տաքություն:
