Երեքշաբթի Հարավային եւ Հյուսիսային Կորեաների զինվորականները Փհանմունջոմ սահմանապահ կետում բանակցություններ են վարել, հայտնում է Yonhap գործակալությունը:
Հաղորդագրության մեջ նշվում է, որ բանակցությունները, որոնց գլխավոր նպատակն է Կորեական թերակղզում լարվածության թուլացումը, անցկացվել է գեներալական մակարդակով, սակայն այլ մանրամասներ չեն հաղորդվում:
Վերջին 10 տարում Հարավային եւ Հյուսիսային Կորեաների գեներալների մակարդակով առաջին բանակցությունները զինվորականներն անցկացրել էին հունիսի 14-ին: Հանդիպման ժամանակ Սեուլի եւ Փհենյանի ռազմական ներկայացուցիչները պայմանավորվել էին ամբողջությամբ վերականգնել կապի արեւելյան եւ արեւմտյան ռազմական գծերը: Հյուսիսային եւ Հարավային Կորեաների զինվորականների միջեւ հաղորդակցության գծերը սահմանի արեւմտյան հատվածում ստեղծվել են 2002 թվականին, արեւելյան հատվածում՝ 2003 թվականին: Դրանք թույլ են տալիս կապ պահպանել հեռախոսով եւ ֆաքսով:
