ՀԱՊԿ գլխավոր քարտուղար Յուրի Խաչատուրովը, ում Հայաստանում մեղադրում են սահմանադրական կարգի տապալման մեջ, կազմակերպությանը չի դիմել այս իրավիճակի կարգավորման հարցում որեւէ աջակցություն ցույց տալու խնդրանքով, «ՌԻԱ Նովոստի»-ին հայտնել է ՀԱՊԿ գլխավոր քարտուղարի տեղակալ Վալերի Սեմերիկովը:
Սեմերիկովն ասել է, որ Խաչատուրովի հետ շփվում է ծառայողական հարցերով: «Մենք նրա հետ խոսում ենք նաեւ այդ հարցով: Նա որպես վկա անցել է բոլոր ընթացակարգերով»,- նշել է գործակալության զրուցակիցը:
Ի պատասխան հարցին՝ Խաչատուրովը չի՞ խնդրել ստեղծված իրավիճակում աջակցելու մասին, Սեմերիկովը շեշտել է. «Նման ուղերձներ բացարձակապես չեն եղել»:
Հայաստանի Հատուկ քննչական ծառայությունը ՀԱՊԿ գլխավոր քարտուղար Յուրի Խաչատուրովին սահմանադրական կարգի տապալման մեղադրանք է ներկայացրել 2008 թվականի մարտի 1-ին բողոքի ակցիաները ցրելու քրեական գործի շրջանակում: Երեւանում դատարանը Խաչատուրովին գրավի դիմաց ազատ է արձակել: Հայաստանի ԱԳՆ մամուլի քարտուղար Տիգրան Բալայանը հայտարարել է, որ հայկական կողմը «գործընկերներին առաջարկել է սկսել ՀԱՊԿ գլխավոր քարտուղարի փոխարինման գործընթացը, հիմա այս հարցի շուրջ գործընկերների հետ ինտենսիվ խորհրդակցություններ են վարվում»: