ԱՄՆ նախագահ Դոնալդ Թրամփը Հյուսիսային Կորեայի առաջնորդին շնորհակալություն է հայտնել նամակի եւ Կորեական պատերազմի ժամանակ զոհված ամերիկացի զինվորները մասունքներն ուղարկելու համար՝ հայտարարելով, որ «անհամբերությամբ» սպասում է նրա հետ նոր հանդիպմանը, փոխանցում է «ՌԻԱ Նովոստի»-ն:
Հինգշաբթի ԱՄՆ ՌՕՈՒ տրանսպորտային օդանավը ամերիկյան հող է հասցրել Կորեական պատերազմի ժամանակ Հյուսիսային Կորեայի տարածքում զոհված զինվորների մասունքները, որ փոխանցվել էին Սինգապուրի գագաթնաժողովում ձեռք բերված պայմանավորվածության շրջանակում: Հավայներում Հիքամ ավիաբազա է բերվել 55 զինվորի մասունք: Այս կապակցությամբ հանդիսավոր արարողությանը մասնակցել է ԱՄՆ փոխնախագահ Մայք Փենսը, որի հայրը մարտնչել է Կորեական պատերազմում:
«Նախագահ Կիմ Չեն Ըն, շնորհակալություն ձեզ, որ կատարեցիք խոստումը եւ զոհված, մարտում անհետ կորած մեր մեծագույն եւ սիրելի զինվորների մասունքները տուն վերադարձնելու գործընթացը սկսեցիք: Ես զարմացած չեմ, որ դուք այդ բարի գործն արեցիք: Շնորհակալություն նաեւ սիրալիր նամակի համար. ես անհամբերությամբ սպասում եմ ձեզ հետ նոր հանդիպմանը»,- Twitter-ի իր էջում նշել է ԱՄՆ նախագահը:
Անցած հինգշաբթի ամերիկյան տրանսպորտային օդանավը՝ զոհված զինծառայողների մասունքներով, Հյուսիսային Կորեայից ժամանել էր Հարավային Կորեայում ամերիկյան Օսան ավիաբազա: Սա այս հարցով պայմանավորվածությունը կատարելու առաջին քայլն էր:
1950-1953 թվականներին Կորեական պատերազմում զոհված ամերիկացիների թիվը, հաշվի առնելով անհետ կորածներին, կազմում է 36,6 հազար մարդ: Պենտագոնի տվյալներով՝ նրանցից մոտ 5 հազարի աճյունները գտնվում են Հյուսիսային Կորեայի տարածքում: