Քաղաքագետները քննարկում են Ռուսաստանի ԱԳ նախարար Սերգեյ Լավրովի աղմկահարույց հայտարարությունը:
Հիշեցնենք, որ Լավրովը հայտարարել էր, որ Հայաստանում իրադարձությունները հակասում են երկրի նոր ղեկավարության՝ իրենց քաղաքական նախորդներին հետապնդելուց հրաժարվելու մասին հայտարարություններին: «Ռուսաստանը, որպես Երեւանի դաշնակից միշտ էլ շահագրգռված է եղել հայկական պետության կայունությամբ, ուստի այն, ինչ տեղի է ունենում այնտեղ, չի կարող չանհանգստացնել մեզ, այդ թվում, ԱՊՀ տարածքում այն կազմակերպությունների խնդիրների նորմալ աշխատանքի տեսանկյունից, որոնց Հայաստանը անդամակցում է: Վերջին մի քանի օրերի ընթացքում մենք բազմիցս մեր մտահոգությունը հայտնել ենք Հայաստանի ղեկավարությանը: Ակնկալում ենք, որ իրավիճակը, այնուամենայնիվ, կառուցողական ճանապարհով կընթանա»,-հայտարարել է Լավրովը՝ հավելելով, որ վերջին օրերի իրադարձությունները ակնհայտ խախտում են դրական տրամադրվածությունը:
Քննարկմանը մասնակցում են Ռուսաստանի պետական հումանիտար գիտությունների ինստիտուտի պրոֆեսոր, քաղաքագետ Սերգեյ Մարկեդոնովը (տեսազանգի միջոցով Մոսկվայից), Միջազգային և անվտանգության հարցերի հայկական ինստիտուտի ղեկավար, քաղաքագետ Ստյոպա Սաֆարյանը, Կովկասի ինստիտուտի տնօրեն, քաղաքագետ Ալեքսանդր Իսկանդարյանը եւ Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը:
Ինչպես ավելի վաղ հաղորդել էր NEWS.am-ը, 2008 թվականի մարտի 1-2-ի իրադարձություններով Հայաստանի երկրորդ նախագահ Ռոբերտ Քոչարյանին, Հայաստանի պաշտպանության նախկին նախարար Միքայել Հարությունյանին եւ ՀԱՊԿ-ի գլխավոր քարտուղար Յուրի Խաչատուրովին ՀՀ ՔՕ 300.1 հոդվածի 1 մասով մեղադրանքներ են ներկայացվել՝ այլ անձանց հետ նախնական պայմանավորվածություն սահմանադրական կարգը տապալելու նպատակով:
Միքայել Հարությունյանը հետախուզման մեջ է, Յուրի Խաչատուրովը 5 մլն դրամ գրավի դիմաց ազատ է արձակվել, իսկ Ռոբերտ Քոչարյանը դատարանի որոշմամբ կալանավորվել է 2 ամսով:
Վերջինս հուլիսի 26-ին մեծ հարցազրույց էր տվել, որի ընթացքում հայտարարել էր, որ իր դեմ հարուցված քրեական գործը շինծու է եւ քաղաքական պատվեր է: