Կուբայի մայրաքաղաքը լավագույն ուղղությունն է Կարիբյան ավազանի արեւմտյան հատվածում քրուիզային զբոսաշրջության համար։ Այսպիսի եզրահանգման են եկել Cruise Critic ծովային ճանապարհորդությունների պորտալի փորձագետները, փոխանցում է ՏԱՍՍ–ը։
Վարկանիշային աղյուսակի երկրորդ հորիզոնականում Կուբայի մեկ այլ քաղաք է՝ Սենֆուեգոսը, որը տեղակայված է Հավանայից մոտ 250 կմ հարավ–արեւելք։ Երրորդ տեղում Մեքսիկայի Կոսումել քաղաքը։
2014 թվականի դեկտեմբերին ԱՄՆ նախագահ Բարաք Օբաման սկսել էր Կուբայի հետ երկկողմ հարաբերությունների նորմալացման կուրս եւ բացել էր նախկինում ամերիկացիների համար չթույլատրված Կուբա այցելելու հնարավորությունը։
Սակայն 2017 թվականի հունիսին ԱՄՆ նախագահ Դոնալդ Թրամփը հայտարարել է Կուբայի նկատմամբ քաղաքականության խստացման մասին։ Հիմա ամերիկացիներին թույլատրվում է մեկնել Կուբա միայն կազմակերպական խմբերի կազմում եւ ամերիկյան զբոսաշրջային կազմակերպությունների ներկայացուցչի ուղեկցությամբ։ Բացի այդ, ԱՄՆ քաղաքացիներին արգելված է մնալ ավելի քան 80 պետական հյուրանոցներում, ինչպես նաեւ գնումներ կատարել մի քանի խանութներում ու Հին Հավանայում՝ Կուբայի մայրաքաղաքի պատմական հատվածում։
Չնայած Վաշինգթոնի կողմից սահմանված կանոններին՝ 2017 թվականին Կուբա են այցելել շուրջ 620 հազար ամերիկացիներ՝ երկու անգամ ավելին, քան դրանից մեկ տարի առաջ։
