ՀՔԾ պետը այն պաշտոնյան չէ, որ պետք է մեկնաբանի այլ երկրի արտաքին գերատեսչության ղեկավարի խոսքերը։ Այս մասին այսօր՝ օգոստոսի 2-ին կառավարությունում լրագրողների հետ զրույցում նշեց ՀՔԾ պետ Սասուն Խաչատրյանը՝ պատասխանելով Ռոբերտ Քոչարյանի դեմ հարուցված գործի քննության վրա Լավրովի հայտարարության հնարավոր ազդեցության մասին հարցին։
«Իմ մասով կասեմ, որ քաղաքական հետապնդման մասին խոսք չի կարող լինել։ Այս գործընթացը իրավական ընթացակարգերում է»,–նշեց նա։
ՀՔԾ պետն անդրադարձավ այն շահարկումներին, որ ՀՔԾ մեղադրանքի որոշման մեջ կա դրույթ, որով ՀՔԾ–ն կասկածի տակ է դնում ընտրությունների արդյունքները. «Ես պաշտոնապես հայտարարում եմ, որ մեր որոշման մեջ նման դրույթ չկա, մենք կասկածի տակ չենք դրել ընտրությունների արդյունքները, մենք ընդամենը նշել ենք, որ այն քաղաքացիները, որոնք ընտրությունների արդյունքները համարել են կեղծված, իրենց իրավունքները վերականգնելու համար փողոց են դուրս եկել»,–նշեց նա։
Ավելի վաղ Լավրովը հայտարարել էր, որ Հայաստանում տեղի ունեցող իրադարձությունները հակասում են երկրի նոր ղեկավարների հայտարարություններին այն մասին, որ հրաժարվելու են իրենց նախորդների նկատմամբ քաղաքական հետապնդումներից։