Յուրի Խաչատուրովի՝ ՀԱՊԿ իր աշխատանքային պարտականություններին վերադառնալու հետ կապված այսօր՝ օգոստոսի 2-ին, երկրորդ միջնորդությունն է ներկայացվել ՀՔԾ: Այս մասին NEWS.am-ի հետ զրույցում ասաց նրա շահերի պաշտպան Միհրան Պողոսյանը:
«Մենք առաջին միջնորդությունը երկուշաբթի օրն էինք ներկայացրել եւ խնդրել, որ հուլիսի 31-ից Յուրի Խաչատուրովը ցանկանում է վերադառնալ իր աշխատանքային պարտականությունների կատարմանը, սակայն, քանի որ միջնոդությունը չի լուծվել, երկրորդ միջնորդությունը ներկայացրեցինք»,-ասաց պաշտպանը՝ նշելով, որ գրավի կիրառման դեպքում օրենքով չի արգելվում լքել երկրի սահմանը:
Պաշտպանը հավելեց, որ իրենք հավաաստել են, որ նախաքննությունն իրականացնող մարմնի կանչի դեպքում իրենք պատրաստակամ են անմիջապես ներկայանալ, ինչպես եւ ի սկզբանե եղել է:
Ավելի վաղ NEWS.am-ը հայտնել էր, որ նախօրեին Երեւան քաղաքի ընդհանուր իրավասության դատարանը Յուրի խաչատուրովի համար որպես այլընտրանքային խափանման միջոց թույլատրելի էր համարել գրավը:
Ավելի վաղ հայտնել էինք, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քրգործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին եւ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը:
Միքայել Հարությունյանի նկատմամբ հետախուզում է հայտարարվել, իսկ Ռոբերտ Քոչարյանը դատարանի որոշմամբ կալանավորվեց:
ՀՀ երկրորդ նախագահը հուլիսի 26-ին հանդես էր եկել ծավալուն հարցազրույցով, որտեղ իր նկատմամբ քրեական գործը համարել է շինծու եւ քաղաքական պատվերի շրջանակում: