Պարոն Փաշինյանի միակ իրավական հիմքը խորհրդարանի քվեարկությունն է, որտեղ նրա օգտին են քվեարկել նաեւ հանրապետականները, ու դա արվել է նրանց վրա ճնշումների ու անդրկուլիսային պայմանավորվածությունների միջոցով։ Նման տեսակետ հայտնեց Կովկաս ինստիտուտի տնօրեն, քաղաքագետ Ալեքսանդր Իսկանդարյանը Հայաստանի գործընթացներին ռուսական կողմի արձագանքին նվիրված քննարկման ժամանակ։
Պատասխանելով գործընկերների այն հայտարարությանը, որ նախկին իշխանությունների կլեպտոկրատիային վերջ է տրվել՝ քաղաքագետը հեգնանքով հիշեցրեց, որ «հիմա էլ խորհրդարանում պարոն Փաշինյանի հենարանն է պարոն Ծառուկյանի բացարձակապես ոչ կլեպտոկրատական կուսակցությունը, որը վերջին 150 տարիներին աչքի է ընկնում զարմանալի օրինապաշտությամբ ու ազատ մրցակցության օրենքների պահպանումով»։
«Մենք դատում ենք պարոն Խաչատուրովին։ Հիմա ես հարց ունեմ՝ ինչո՞ւ հենց նրան։ Իսկ քի՞չ են եղել զինվորականներ, որոնք ավելի բարձր տարբեր պաշտոններ են զբաղեցրել։ Քաղաքական գործիչները գնում են ու գնալու են փոխզիջումների: «Ու փոխզիջումային որոշումները վերաբերելու են այդ թվում Ռոբերտ Քոչարյանի գործին։ Քանի որ այդ գործն ունի բավականին լուրջ քաղաքական բաղադրիչ»,- նշեց Իսկանդարյանը՝ կասկած հայտնելով դատավորների գործունեության վրա քաղաքական իրավիճակի ազդեցության բացակայության կապակցությամբ։ «Դժվար է ենթադրել, որ այդ նույն դատավորները, որոնք ծառայում էին հանրապետական իշխանությունների օրոք, չգիտես ինչու արթնացել են գիշերվա ժամը երկուսին ու որոշել են այդ գործը հենց հիմա բացել, այլ ոչ թե կես տարի առաջ, ու դա ոչ մի կապ չունի երկրում քաղաքական իրավիճակի հետ։ Այնպես որ փոխզիջումային համաձայնություններ կլինեն, ու արտաքին ուժերն էլ հաշվի կառնվեն»։