Օգոստոսի 2-ին Երեւանում տեղի է ունեցել VIII Համահայկական կրթական համաժողովի բացման արարողությունը: Համաժողովին մասնակցում են աշխարհի 24 երկրների կրթական ոլորտի 120 ներկայացուցիչներ, այդ թվում՝ Հայաստանից եւ Արցախից:
Ինչպես նշեց Հայաստանի կրթության եւ գիտության նախարար Արայիկ Հարությունյանը, միջոցառման նպատակն է կրթական ոլորտում հրատապ հարցերի քննարկումը եւ Սփյուռքի հետ համատեղ ծրագրերի իրականացման ուղղությամբ նախարարության հետագա քայլերի որոշումը: Հարությունյանը հույս հայտնեց, որ այս համաժողովը կմեծացնի Հայաստան-Սփյուռք համագործակցության արդյունավետությունը:
Արցախի կրթության, գիտության եւ սպորտի նախարար Նարինե Աղաբալյանն, իր հերթին, խոսելով Հայաստան-Արցախ-Սփյուռք համագործակցության մասին՝ նշեց մի շարք խնդիրներ լուծելիս փոխօգնության մթնոլորտի ձեւավորման անհրաժեշտությունը: Մասնավորապես՝ նա նշեց, որ Արցախում, հատկապես գյուղերում դպրոցներ կան, որտեղ աշակերտների թիվը 20-ից չի անցնում: Մի կողմից՝ նման պայմաններում դժվար է կրթական բարձր մակարդակ ապահովել, մյուս կողմից՝ նման դպրոցների փակումը կբերի գյուղական բնակչության արտագաղթին:
«Մեր խնդիրն է նրանց գիտելիքներ տալ, որն օգտակար կլինի իրենց համայնքների զարգացման համար: Նրանք պետք է հստակ հասկանան, որ հայրենի հողը երբեք առեւտրի առարկա չի դառնա»,- շեշտեց Նարինե Աղաբալյանը:
Այսպես՝ Ասկերանի շրջանի Սիզնեկ գյուղի դպրոցում ընդամենը 11 աշակերտ է սովորում, որոնցից 4-ը առարկայական օլիմպիադաների մրցանակակիրներ են: Աղաբալյանի մտահոգությունը պայմանավորված է այն հանգամանքով, որ նման դպրոցների աշակերտները զրկված են իրենց տարեկիցների հետ շփումների լայն շրջանակից:
Աղաբալյանը հույս հայտնեց, որ նման խնդիրների լուծմանը կօգնեն եղբայր-դպրոցները, որոնք միավորում են Արցախի եւ Սփյուռքի ջանքերը: «Խոսքը աշակերտների համար համատեղ դասերի անցկացման, ծրագրերի փոխանակման մասին է: Արցախցի ուսուցչները կկարողանային Սփյուռքի կրթական հաստատություններում դասավանդել Հայ եկեղեցու պատմություն, Հայաստանի պատմություն, գրաբար եւ այլ առարկաներ»,- նշեց նա:
VIII Համահայկական կրթական համաժողովը իր աշխատանքը կավարտի օգոստոսի 6-ին: Համաժողովն անցկացվում է տարեկան 2 անգամ Հայաստանի կրթության եւ գիտության նախարարության կողմից: