Հայ-թուրքական սահմանի Գյումրիի հատվածում սահմանախախտի են բռնել: Հայաստանում ծառայություն իրականացնող ռուս սահմանապահները տղամարդուն բռնել են ինժեներա-տեխնիկական միջոցները հաղթահարելու փորձ կատարելիս: Նա Թուրքիայի քաղաքացի է: Խուզարկության ժամանակ տղամարդու մոտ բջջային հեռախոս են գտել, որում պետական սահմանին տեղակայված ինժեներական կառույցների եւ պատնեշների լուսանկարներ ու ֆայլեր են եղել: Սահմանախախտին փոխանցել են Հայաստանի իրավապահ մարմիններին:
Կառավարության այսօրվա նիստն ուրախ տրամադրությամբ է սկսվել: Առողջապահության ոլորտի ծրագիր ներկայացնելիս Նիկոլ Փաշինյանը շփոթել է նախարարներին, հետո կատակել:
Գործադիրի այսօրվա օրակարգում 29 հարց էր ներառված, որոնց գերակշիռ մասը՝ 26-ը՝ չզեկուցվող: Օրակարգը սպառելուց հետո Նիկոլ Փաշինյանը կառավարության անդամների ուշադրությունը հրավիրել է կրթական համակարգում գոյություն ունեցող խնդրի, իր բնորոշմամբ՝ զուգահեռ իրականությունների գոյության վրա: Հայաստանի բուհերում, օրինակ, իրավաբանների, դիվանագետների են պատրաստում, իսկ գերատեսչությունների կազմում նույն մասնագիտություններով ակադեմիաներ են գործում: Ստացվում է, որ բուհական կրթությունը բավարար չէ գործնական աշխատանքի անցնելու համար: Որպես լուծման տարբերակ՝ վարչապետն առաջարկում է ակադեմիաները նույնականացնել բուհերի համապատասխան ֆակուլտետների հետ:
Կրթության նախարարը նույնպես բուհական ոլորտում լուրջ փոփոխության կարիք է տեսնում. մասնավորապես, մասնավոր բուհերի պարագայում Արայիկ Հարությունյանն առաջարկում է գնալ խոշորացման կամ փակման ճանապարհով: Բուհերի ներկայացուցիչների հետ հանդիպմանն արդեն քննարկել է հարցը:
Իսկ Հատուկ քննչական ծառայության ղեկավարից լրագրողները հետաքրքրվել են Մարտի 1-ի գործով վերջին իրադարձություններից, մասնավորապես, Ռոբերտ Քոչարյանին կալանավորելու որոշումից եւ երկրորդ նախագահի պաշտպանների հայտարարություններից այն մասին, որ մեղադրանքն իրավական անգրագիտություն է: Սասուն Խաչատրյանն այդ հայտարարությունները մանիպուլյացիա եւ ծիծաղելի է որակել, նաեւ հավելել, որ վկայի կարգավիճակով հարցաքննության կանչված Ռոբերտ Քոչարյանին մեղադրանք առաջադրելու մեջ որեւէ խախտում չկա:
Սասուն Խաչատրյանը նաեւ պարզաբանել է, թե ինչու, ասենք, նույն գործով Յուրի Խաչատուրովի պարագայում դատարանը գրավի որոշում կայացրեց, Ռոբերտ Քոչարյանի դեպքում՝ կալանավորման:
Յուրի Խաչատուրովը կարող է հեռանալ Հայաստանից, սակայն պարտավոր է քննչական մարմնի առաջին իսկ պահանջով ներկայանալ: Հատուկ քննչական ծառայությունում այսպես են պատասխանել Խաչատուրովի պաշտպան Միհրան Պողոսյանի միջնորդությանը: Փաստաբանը Յուրի Խաչատուրովի՝ ՀԱՊԿ-ում աշխատանքային պարտականություններին վերադառնալու հետ կապված այսօր երկրորդ միջնորդությունն էր ներկայացրել ՀՔԾ: Այն, փաստորեն, բավարարվել է:
Ավելի վաղ Հատուկ քննչական ծառայությունից պարզաբանել էին, որ Խաչատուրովի նկատմամբ սահմանված խափանման միջոց գրավը երկրի սահմաններից դուրս գալու խոչընդոտ չի համարվում, բայց քննչական մարմնի համաձայնություն է պետք, ինչի համար էլ փաստաբանը ՀՔԾ էր դիմել: Հավելենք, որ օգոստոսի 2-ի ժամը 18։00-ի դրությամբ Խաչատուրովը դեռեւս չէր հեռացել Հայաստանից: Մինչ այդ, հայկական կողմն արդեն ՀԱՊԿ գլխավոր քարտուղարին փոխելու գործընթաց է նախաձեռնել:
«Ելք» դաշինքում պառակտումն այլեւս ակնհայտ է. դրա կազմում ընդգրկված «Լուսավոր Հայաստան» եւ «Հանրապետություն» կուսակցությունները որոշել են Երեւանի ավագանու ընտրություններին մասնակցել առանձին դաշինքով: Նոր դաշինքը նաեւ նոր անվանում կունենա, սակայն դրա մասին դեռեւս չեն հայտնում: Էդմոն Մարուքյանի եւ Արամ Սարգսյանի կուսակցությունների դաշինքից քաղաքապետի թեկնածու է առաջադրվել արդարադատության նախարար Արտակ Զեյնալյանը. նա Արամ Սարգսյանի «Հանրապետություն» կուսակցության անդամ է: «Ելք»-ի մյուս կուսակցությունը՝ Նիկոլ Փաշինյանի «Քաղաքացիական պայմանագիրն» էլ օրեր առաջ քաղաքապետի պաշտոնում առաջադրել էր դերասան Հայկ Մարությանին: Գործող ավագանու «Ելք» խմբակցության անդամ Դավիթ Խաժակյանն ասում է՝ շարունակում է նախընտրելի մնալ ընտրություններին երեք ուժերով մասնակցության ձեւաչափը, եւ քննարկումները դեռ չեն ավարտվել:
Արդեն Երեւանի քաղաքապետի թեկնածու ունի նաեւ ԲՀԿ-ն. ավագանու արտահերթ ընտրություններում Գագիկ Ծառուկյանի կուսակցության ցուցակը կգլխավորի պատգամավոր Նաիրա Զոհրաբյանը: Ընտրացուցակի երկրորդ տեղում Պետրոս Ղազարյանն է, նրան հաջորդում է Արման Աբովյանը: Ազգային ժողովի «Ծառուկյան» խմբակցությունից եւս մեկ պատգամավոր է հավակնում Երեւանի քաղաքապետի պաշտոնին: Խմբակցության քարտուղար Վահե Էնֆիաջյանի տեղեկացմամբ՝ առաջիկա ընտրություններին կմասնակցի նաեւ Արարատ Զուրաբյանը, ով կգլխավորի ՀՀՇ-ի ցուցակը:
Անապայում Հայաստանի քաղաքացի է սպանվել: 43-ամյա հային դանակահարելու մեղադրանք է առաջադրվել Կալմիկիա Հանրապետության 36-ամյա բնակչի: Ռուսական աղբյուրների համաձայն՝ վերջինը հարբած վիճակում մոտեցել է Անապայի սրճարաններից մեկում աշխատող Հայաստանի քաղաքացուն, տղամարդկանց միջեւ վիճաբանություն է սկսվել: Այդ ժամանակ էլ Կալմիկիայից զբոսաշրջիկը վերցրել է դանակն ու բազմաթիվ հարվածներ հասցրել «հակառակորդին»: Ստացած վնասվածքներից տուժողը տեղում մահացել է:
ԱՄՆ-ի եւ Թուրքիայի հարաբերություններում լարվածությունն աճում է: Վաշինգտոնը որոշել է պատժամիջոցներ սահմանել Թուրքիայի արդարադատության եւ ներքին գործերի նախարարների նկատմամբ: Իսկ պատճառը Թուրքիայում ամերիկացի քահանա Էնդրյու Բրանսոնի ձերբակալությունն է. նրան մեղադրում են լրտեսության եւ ահաբեկիչներին աջակցելու մեջ: Հոգեւորականին 35 տարի ժամկետով ազատազրկում է սպառնում: Սպիտակ տան մամուլի քարտուղար Սառա Սանդերսն ասել է՝ այս երկու պաշտոնյաներն առանցքային դեր են խաղացել Բրանսոնի կալանավորման հարցում:
Պաշտոնական Անկարան շտապել է հայտարարել, որ թուրք պաշտոնյաների նկատմամբ պատժամիջոցներն իրավական հիմք չունեն, իսկ ԱՄՆ-ին կոչ է արել փոխել այս սխալ որոշումը: Հակառակ պարագայում, Թուրքիայի ԱԳՆ սպառնացել է պատասխան պատժամիջոցներ կիրառել: Այս իրադարձությունների ֆոնին թուրքական լիրան արդեն այսօր բոլոր ժամանակների փոխարժեքի անկման ռեկորդ է սահմանել՝ 1 դոլարի դիմաց կազմելով շուրջ 5 լիրա: Ազգային արժույթի արժեզրկման հետ մեկտեղ՝ դիրքերն է զիջում նաեւ թուրքական ֆոնդային բորսան՝ դոլարային արտահայտությամբ:
Օգոստոսի 2-ին դոլարը փոքր-ինչ թանկացել է, իսկ եվրոն էժանացել է եւս 3 դրամով: Դոլարի փոխարժեքը կազմել է 481 դրամ, եվրոյինը՝ 558, ռուբլունը՝ 7 դրամ 60 լումա, ֆունտինը՝ 629 դրամ:
Օգոստոսի 3-ին հանրապետության շրջանների զգալի մասում գիշերը եւ երեկոյան ժամերին սպասվում է անձրեւ եւ ամպրոպ: Օդի ջերմաստիճանը 5-6 աստիճանով կնվազի: Երեւանում նույնպես երեկոյան ժամերին հնարավոր են տեղումներ: Մայրաքաղաքում գիշերը կդիտվի +20+22, ցերեկը՝ +34+36 աստիճան տաքություն:
