ԱՄՆ նախագահ Դոնալդ Թրամփը Փենսիլվանիայի նահանգում իր համակիրների առջեւ հերթական ելույթում կրկին քննադատել է լրատվամիջոցներին՝ լրագրողների ռեպորտաժները նողկալի անվանելով, փոխանցում է «ՌԻԱ Նովոստի»-ն:
«Ի՞նչ է պատահել ազատ մամուլին: Նրանք չեն լուսաբանում: Նրանք միայն պատմություններ են հորինում»,- ասել է նա:
ԱՄՆ նախագահը «սուտ» եւ «նողկալի» է անվանել նորությունները, որոնք իր մասին գրում են լրատվամիջոցները:
Թրամփը լրագրողներին քննադատել է նաեւ այն պատճառով, որ «սխալ» են լուսաբանել իր հանդիպումները Հյուսիսային Կորեայի, Ռուսաստանի առաջնորդների եւ Մեծ Բրիտանիայի թագուհու հետ: Նա պաշտպանել է իր մոտեցումը Կիմ Չեն Ընի եւ Վլադիմիր Պուտինի հետ հանդիպումներին՝ հայտարարելով, որ նրանց երկրների հետ ավելի ջերմ հարաբերությունները «ոչ թե վատ, այլ լավ բան են»: