Հայաստանը մինչեւ ժամկետի ավարտը պետք է շարունակի նախագահությունը Հավաքական անվտանգության պայմանագրի կազմակերպությունում: Այս մասին, այսօր՝ օգոստոսի 3-ին, Մոնթե Մելքոնյանի անվան ռազմամարզական վարժարանում լրագրողների հետ զրույցում ասաց Հայաստանի պաշտպանության նախարար Դավիթ Տոնոյանը:
Հարցին, թե ռուսական կողմը Յուրի Խաչատուրովի հարցը ՀՀ ՊՆ-ի առջեւ բարձրացրե՞լ է, որ քրեական հետապնդումն ազզդում է ՀԱՊԿ հեղինակության վրա, որ պետք է դադարեցնել հետապնդումը, Դավիթ Տոնոյանը պատասխանեց. «Պաշտպանության նախարարության հետ ոչ մի կերպ»:
Դիտարկմանը, թե Հայաստանը ՀԱՊԿ գլխավոր քարտուղարի պաշտոնում Խաչատուրովին փոխարինելու թեկնածու ունի՞, Դավիթ Տոնոյանը պատասխանեց. «Այդ հարցը դեռեւս ինձ հետ չի քննարկվել, բայց ես կարծում եմ, որ Հայաստանի հանրապետությունն ունի ժամկետ եւ կարծում եմ, որ Հայաստանը պետք է շարունակի իր նախագահումը եւ ՀԱՊԿ գլխավոր քարտուղարի պաշտոնավարումը»։
Նախարարն ասաց, որ ՀԱՊԿ գլխավոր քարտուղարի հետ կապված որոշումը կոլեգիալ է լինելու, դեռ այդ հարցին չեն անդրադարձել:
Ավելի վաղ NEWS.am-ը հայտնել էր, որ 2008 թվականի մարտի 1-ից 2-ն ընկած ժամանակահատվածում Երեւանում տեղի ունեցած իրադարձությունների վերաբերյալ քրգործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին եւ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը:
Միքայել Հարությունյանի նկատմամբ հետախուզում է հայտարարվել, Ռոբերտ Քոչարյանը դատարանի որոշմամբ կալանավորվել է, իսկ Յուրի Խաչատուրովը 5 մլն դրամ գրավի դիմաց ազատ է արձակվել:
Հայաստանը դիմել է ՀԱՊԿ անդամ երկրներին կազմակերպության գլխավոր քարտուղարի փոփոխության գործընթաց սկսելու հարցով: Յուրի Խաչատուրովը ՀԱՊԿ գլխավոր քարտուղարի պարտականությունները ստանձնել է 2017թ. մայիսից: ՀԱՊԿ-ում Հայաստանի նախագահության ժամկետը մինչեւ 2020թ. հունվարն է: