Հյուսիսային Կորեայի սպառազինությունների ծրագրերի ուղղությամբ աշխատանքը չի համընկնում ապամիջուկայնացմանը երկրի առաջնորդի հանձնառությանը։ Այս մասին հայտարարել է ԱՄՆ պետքարտուղար Մայք Պոմպեոն, փոխանցում է Reuters–ը։
Նրա խոսքով՝ աշխարհը պահանջում է, որ Հյուսիսային Կորեան գնա ապամիջուկայնացման. «Սակայն նրանց պահվածքը հակասում է դրան։ Նրանք խախտում են ՄԱԿ ԱԽ բանաձեւերը։ Այնուամենայնիվ, մենք ունենք բոլոր հնարավորությունները վերջնական արդյունքի հասնելու, որին ձգտում ենք»,–ասել է Պոմպեոն։
Նշենք, որ Միացյալ Նահանգներում տեղեկություն է հայտնվել այն մասին, որ Հյուսիսային Կորեայում վերսկսվել է միջմայրցամաքային բալիստիկ հրթիռների արտադրությունը։ Այսպիսի եզրահանգման եկել են ԱՄՆ հատուկ ծառայությունները արբանյակից արված լուսանկարների հիման վրա։
