Ադրբեջանական տարածքում բռնկված հրդեհը Հայաստան է հասել: Տավուշի սահմանամերձ Բերդավան համայնքում տարածված հրդեհի հետեւանքով շուրջ 10 հեկտար խաղողի այգի է այրվել: Գյուղացիներին ու հրշեջներին հաջողվել է մարել կրակը: Բերդավանի գյուղապետն ասում է՝ հրդեհաշիջման աշխատանքների ժամանակ ադրբեջանական կողմից կրակոցներ են արձակել: Բարեբախտաբար, ոչ ոք չի տուժել: Համայնքապետը կարծում է, որ հակառակորդը լուսածիր գնդակներով է կրակել:
Կարմիր խաչի միջազգային կազմակերպության ներկայացուցիչները Բաքվում այցելել են ադրբեջանական գերության մեջ գտնվող Կարեն Ղազարյանին:
Ավելի ուշ վարչապետի տիկին Աննա Հակոբյանը փոխանցել է կազմակերպության ներկայացուցչից ստացած տեղեկությունը. Կարեն Ղազարյանը ողջ եւ առողջ է, նրան նաեւ մոր նամակն են փոխանցել: Բերդավան գյուղի 34-ամյա բնակիչն անհայտ պատճառներով ադրբեջանական տարածքում էր հայտնվել հուլիսի կեսերին: Բաքուն տեղեկություն էր տարածել, որ Ղազախի շրջանում դիվերսիոն ներթափանցման փորձ է կասեցրել եւ «հայ հետախույզի» գերեվարել: Հայկական կողմը հերքել էր՝ նշելով, որ Կարեն Ղազարյանը ոչ մի առնչություն չունի զինվորական ծառայության հետ եւ երբեք չի ծառայել հայկական զինված ուժերում:
Ռուսական 100 մլն դոլարի վարկային ծրագրով սպառազինության մատակարարման հետ կապված խնդիրներ չկան: Դավիթ Տոնոյանը հերքել է ռուսական հրապարակումներն այն մասին, որ սպառազինության մատակարարումը դադարեցվել է, նաեւ հավաստել, որ ռուսական կողմից այդ հարցով ճնշումներ չկան:
Պաշտպանության նախարարը նաեւ չի բացառել, որ Հայաստանը Ռուսաստանից նոր ռազմական վարկ վերցնի: Սակայն դրա չափի, ինչպես նաեւ բանակցությունների մասին Դավիթ Տոնոյանը ոչինչ չի նշել: Նախարարն անդրադարձել է նաեւ սահմանային իրավիճակին:
Դավիթ Տոնոյանը նախօրեին հանդիպել է Հայաստան ժամանակ Ռուսաստանի պաշտպանության փոխնախարար Ալեքսանդր Ֆոմինի գլխավորած պատվիրակությանը: Պաշտոնյաներն այսօր լրագրողներին ասել են՝ գոհ են բանակցություններից: Ինչ վերաբերում է Յուրի Խաչատուրովին առաջադրված մեղադրանքին. Դավիթ Տոնոյանն ասել է՝ անձամբ իր հետ ռուսական կողմը հարցը չի քննարկել: Նա, սակայն վստահեցրել է, որ Հայաստանը մինչեւ ժամկետի ավարտը պետք է շարունակի նախագահությունը ՀԱՊԿ-ում:
Երեւանի ավագանու ընտրություններին ընդառաջ կրքերն արդեն թեժացել են: Հիմա էլ «կռիվ է ընկել» «Բարգավաճ Հայաստանում»: Արդեն հայտնի է, որ Գագիկ Ծառուկյանի կուսակցության քաղաքապետի թեկնածուն պատգամավոր Նաիրա Զոհրաբյանն է: «Ծառուկյան» խմբակցությունից նրա գործընկեր Գեւորգ Պետրոսյանին, սակայն, ԲՀԿ-ի ընտրությունը դուր չի եկել: Ֆեյսբուքյան գրառմամբ Պետրոսյանը կարծիք է հայտնել, որ «Բարգավաճ Հայաստանում» ավելի արժանավոր եւ ունակ կադրեր կան, իսկ «աղբանոց մեկօրյա այցն ու թունավորված զոհի դիմակ հագնելը», ըստ նրա, դեռ բավարար չէ Երեւանի քաղաքապետ լինելու համար: Գրառման մեջ «այստեղ ես այլեւս անելիք չունեմ» արտահայտությունը կարծիքների տեղիք էր տվել, որ Գեւորգ Պետրոսյանը ցանկանում է հրաժարվել մանդատից: Պատգամավորը մեր թղթակցին ասել է՝ չի պատրաստվում վայր դնել մանդատն ու լքել կուսակցությունը, պարզապես չի մասնակցելու Երեւանի ավագանու ընտրություններին եւ չի սատարելու Նաիրա Զոհրաբյանի թեկնածությունը:
Պետրոսյանի գրառմանը Նաիրա Զոհրաբյանը չի ցանկացել արձագանքել: Փոխարենը խոսել է իր առաջադրման մասին: Կարծում է՝ մայրաքաղաքը պետք է կին քաղաքապետ ունենա: Քաղաքապետի թեկնածուն արդեն նաեւ նախընտրած կարգախոս ունի:
Վրաստանի նավահանգստային Փոթի քաղաքում հորդառատ անձրեւների հետեւանքով հեղեղումներ են: Սեւծովյան նավահանգստում տեղատարափ անձրեւներից առաջացած ջրհեղեղից բնակելի թաղամասեր են տուժել: Ջրածածկ են եղել բնակելի շենքերի բակերը, առաջին հարկերն ու փողոցները:
Օգոստոսի 3-ին դոլարը շարունակել է թանկանալ, եվրոն եւ ռուբլին էժանացել են: Դոլարի փոխարժեքը կազմել է 481 դրամ, եվրոյինը՝ 557, ռուբլունը՝ 7 դրամ 58 լումա, ֆունտինը՝ 626 դրամ:
Օգոստոսի 4-ին հանրապետությունում գիշերը եւ երեկոյան ժամերին սպասվում է անձրեւ եւ ամպրոպ, առանձին հատվածներում՝ կարկուտ: Օդի ջերմաստիճանը 3-4 աստիճանով կնվազի: Երեւանում նույնպես հնարավոր են տեղումներ: Մայրաքաղաքում գիշերը կդիտվի +19+21, ցերեկը՝ +32+34 աստիճան տաքություն:
