Որպես պաշտպանական թիմի նոր անդամ՝ ես նույնպես երկուշաբթի բողոք եմ ներկայացնելու կալանավորման մասին առաջին ատյանի դատարանի որոշման դեմ: Այս մասին այսօր՝ օգոստոսի 4-ին լրագրողների հետ հանդիպմանը հայտարարեց ՀՀ երկրորդ նախագահ Ռոբերտ Քոչարյանի պաշտպանական խմբի անդամ, փաստաբան Հայկ Ալումյանը:
Նա նաեւ հերքեց տեղեկությունը, որ երկրորդ նախագահի պաշտպանական կողմի վերաքննիչի բողոքն այսօր է քննվելու:
«Երեկ, կարծում եմ՝ թյուրիմացաբար, ես այդտեղ դիտավորություն չեմ տեսնում, ՀՔԾ պետի կողմից տեղեկատվություն հնչեցվեց, իբրեւ մեր վերաքննիչ բողոքը քննվելու է այսօր՝ օգոստոսի 4-ին: Այդպիսի բան չկա: Առայժմ պաշտոնապես հայտնի չէ, թե ով է քննելու բողոքը եւ, առավել եւս, երբ է քննվելու այն: Մինչեւ բողոքարկման ժամկետը չլրանա, ավելորդ է խոսել այն մասին, թե բողոքը երբ է քննվելու»,- ասաց Հայկ Ալումյանը:
Լրագրողի հարցին ի պատասխան՝ փաստաբանը նշեց, որ որեւէ հիմք չկա ասելու, որ պաշտպանների վերաքննիչ բողոքը վարույթ չի ընդունվել:
Հիշեցնենք, որ Ռոբերտ Քոչարյանին Մարտի 1-ի գործով մեղադրանք է առաջադրվել. նա 2 ամսով կալանավորված է: ՀՀ երկրորդ նախագահի շահերի պաշտպանները խափանման միջոց կալանքը փոխելու պահանջով Վերաքննիչ դատարան բողոք են ներկայացրել:
Ավելի վաղ NEWS.am-ը հայտնել էր, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քրգործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին եւ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը:
Միքայել Հարությունյանի նկատմամբ հետախուզում է հայտարարվել, Յուրի Խաչատուրովը 5 մլն գրավի դիմաց ազատ է արձակվել, իսկ Ռոբերտ Քոչարյանը դատարանի որոշմամբ կալանավորվել է:
