Հայաստանի նոր վարչապետ Նիկոլ Փաշինյանն որոշել է այս կերպ ինքնահաստատվել: NEWS.am-ի թղթակցի հետ զրույցում այսպիսի կարծիք հայտնեց Ռազմավարությունների եւ տեխնոլոգիաների ռուսական կենտրոնի տնօրեն Ռուսլան Պուխովը՝ մեկնաբանելով երկրի երկրորդ նախագահ Ռոբերտ Քոչարյանի կալանավորումը եւ ՀԱՊԿ գործող գլխավոր քարտուղար գեներալ-գնդապետ Յուրի Խաչատուրովի նկատմամբ նախաձեռնված քրեական հետապնդումը:
Պուխովը նշեց, որ Փաշինյանը պաշտոնապես սա կարող է պատճառաբանել իր նախընտրական որոշ խոստումներով, ինչն իրականությանը այնքան էլ չի համապատասխանում: «Համանման քայլեր ձեռնարկելով, փորձելով իշխանությունն իր ձեռքն ավելի ամուր վերցնել՝ Փաշինյանն ընդամենը սասանում է երկրի ներքին իրավիճակը»,- շեշետեց Պուխովը՝ հավելելով, որ ՀԱՊԿ գործող գլխավոր քարտուղարի կալանավորումը ընդհանրապես նոնսենս էր:
Փորձագետի կարծիքով՝ եթե Խաչատուովի նկատմամբ իսկապես ինչ-որ պահանջներ էին առաջացել, ապա դրանք հարկ էր համաձայնեցել գոնե ռուսական կողմի հետ: Ընդ որում՝ Ռուսաստանում, ինչպես նշեց փորձագետը, նույնիսկ չգիտեն, թե որքանով են հիմնավորված գլխավոր քարտուղարին ներկայացվող պահանջները, եւ իրադարձությունների զարգացումն ընթանում է սկանդալային սցենարով: «Կարելի էր մտածել, որ Հայաստանի ներկայիս ղեկավարությունն ուղղակի քաղաքական փորձ չունի, ինչն, ի դեպ հենց այդպես է: Սակայն մենք արդեն առաջին անգամ չենք բախվում նման բանին»,- նշեց նա:
Հայկական իշխանությունների նման կարգի գործողությունները Ռուսաստանի մոտ տարակուսանք են հարուցում, ասաց Պուխովը: Սակայն, ըստ նրա, էլ ավելի մեծ տարակուսանք է հարուցում նրանց պահվածքի ձեւը:
Հիշեցնենք, որ կալանավորված Ռոբերտ Քոչարյանը եւ չհեռանալու մասին ստորագրությամբ ազատված Յուրի Խաչատուրովը մեղադրվում են 2008 թվականի մարտի 1-2-ի իրադարձությունների ժամանակ սահմանադրական կարգի տապալման մեջ:
